Jalgaon News : खानदेशात मृग बहरातील अर्ली केळी लागवड पुढील आठवड्यात सुरू होणार आहे. यंदा केळी लागवड खानदेशात सुमारे १५ ते २० हजार हेक्टरने वाढू शकते, असे संकेत आहेत.

केळीचे दर यंदा टिकून आहेत. इतर पिकांमध्ये शेतकऱ्यांना फटका सहन करावा लागला आहे. कारण दर कमी अधिक झाले. केळी पीक शेतकऱ्यांना बऱ्यापैकी परवडले. कांदेबाग केळी व मृग बहर केळीचे उत्पादनही बऱ्यापैकी आले. जळगाव जिल्ह्यात मृग बहर केळीची काढणी मार्च अखेरिस सुरू होते.

तर कांदेबाग केळीची काढणी दसरा सणापासून सुरू होत असते. सध्या पिलबाग, आगाप मृग बहर केळीची काढणी सुरू आहे. या केळीला किमान ८०० व कमाल २५०० रुपये प्रतिक्विंटलचा दर आहे. मृग बहर केळीची लागवड मे महिन्यात सुरू होते. अर्ली लागवड फेब्रुवारीच्या पहिल्या आठवड्यात केली जाते.

तर नियमीत लागवड जूनपासून सुरू होते. खानदेशात मृग बहर केळीखालील क्षेत्र अधिक असते. तर कांदेबाग केळीखालील क्षेत्र कमी असते. कांदेबाग केळीची लागवड जळगाव जिल्ह्यातील चोपडा, जळगाव, पाचोरा, जामनेर भागात केली जाते.

तर मृग बहर केळीची लागवड जळगाव जिल्ह्यातील रावेर, यावल, मुक्ताईनगर, जामनेर, नंदुरबारमधील तळोदा, शहादा भागात केली जाते. खानदेशात गेल्या हंगामात मृग बहर केळीची लागवड सुमारे ४१ हजार हेक्टरवर झाली होती. यंदा ही लागवड सुमारे ५० ते ५५ हजार हेक्टरवर होवू शकते.

या केळीसाठी शेतकरी उतिसंवर्धित रोपांचा उपयोग करीत आहेत. ही रोपे खानदेशात विविध कंपन्यांतर्फे पुरविली जात असून, रोपांचा पुरवठा विस्कळीत आहे. जागेवर १५ ते १७ रुपये प्रतिरोप, असे दर आहेत. रोपांच्या चांगल्या उगवणक्षमतेसाठी शेतकरी रोपांभोवती धैंचा, तागाची लागवड करीत आहेत. यामुळे उष्णतेपासून रोपांचे संरक्षण होत आहे. अर्ली मृग बहर केळी लागवड रावेर, मुक्ताईनगर, नंदुरबारमधील शहादा भागात सुरू आहे.