Nagpur News : ‘‘ग्रामीण भागातील कारागिरांकडून उत्पादित वस्तूंना बाजारपेठ मिळावी, याकरिता महाराष्ट्र राज्य खादी ग्रामोद्योग मंडळाकडून पुढाकार घेतला जाणार आहे. त्या अंतर्गत चांदा ते बांदा अशी यात्रा काढून अशा उत्पादनांविषयी जागृती केली जाईल. खादी यात्रा असे याला नाव देण्याचे प्रस्तावित आहे,’’ अशी माहिती खादी ग्रामोद्योग मंडळाचे सभापती रवींद्र साठे यांनी दिली.

नागपूर दौऱ्यावर असलेल्या श्री. साठे यांनी ‘ॲग्रोवन’बरोबर संवाद साधला. ते म्हणाले, ‘‘बारा बलुतेदार व्यवस्थेत ग्रामीण भागातील कारागिरांना संरक्षण होते. पुढे ही व्यवस्था मर्यादित झाली; मात्र आजही ग्रामीण भागात अनेक दर्जेदार वस्तूंचे उत्पादन होते.

खादी कापडालाही मागणी आहे. त्यात वाढ व्हावी, याकरिता खादी यात्रा काढण्यात येईल. राज्यात ग्रामोद्योग वसाहती उभारण्याचे काम देखील आमचे आहे. गेल्या अनेक वर्षांत हे काम झाले नाही. यापुढील काळात त्याला प्रोत्साहन दिले जाईल.’’

‘‘ग्रामोद्योग भरारी सन्मान पुरस्काराद्वारे याद्वारे छोट्या उद्योग, उद्योजकांना प्रोत्साहन देण्याचा प्रयत्न केला आहे. राजभवनला हा पहिला पुरस्कार सोहळा झाला. ‘हर घर खादी, घर घर खादी’ या संकल्पनेवर देखील खादी महामंडळ काम करणार आहे. छोट्या उद्योजकांनी तयार केलेल्या वस्तूंची खरेदी करावी, असे यात अपेक्षित आहे. यात प्रशासकीय विभागस्तरावर खादी प्रदर्शनाचेही आयोजन होईल.

राज्यातील सहा विभागांत अशा प्रकारचे प्रदर्शन भरविण्याचे प्रस्तावित आहे. खादी प्रमोशनसाठी मुंबईतील तीन महाविद्यालयांनी सामंजस्य करार केले आहेत. शासकीय कार्यालयातील कर्मचारी, अधिकाऱ्यांनी दर सोमवारी खादी घालावी, असा सरकारचे परिपत्रकाद्वारे निर्देश आहेत. आमच्या कार्यालयात आम्ही दर सोमवारी खादी वापरतो. यातून देखील खादीचा वापर वाढेल,’’ असे साठे म्हणाले.