Kolhapur Politics : ‘महाराष्ट्र व कर्नाटकातील जनतेची वरदायिनी असलेल्या काळम्मावाडी धरणाच्या गळतीचा प्रश्न मागील दहा वर्षे ज्यांनी लोंबकळत ठेवला, त्यांनीच घाईगडबडीत धरणाशी संबंधित कालव्यांचे अस्तरीकरण निकृष्ट करण्यात धन्यता मानली. हे सारे नेमके कोणाच्या फायद्यासाठी व कशासाठी?’ असा खडा सवाल ठाकरे गटाचे उमेदवार के. पी. पाटील यांनी शिंदे गटातील प्रकाश आबिटकर यांचे नाव न घेता केला. शेळेवाडी (ता. राधानगरी) येथे बुधवारी (ता.०६) झालेल्या प्रचार सभेत ते बोलत होते.

पाटील म्हणाले, ‘काळम्मावाडी धरणामुळे लोकांना समृद्धीचे दिवस बघता आले. परंतु गेल्या दहा वर्षांत धरणाच्या गळतीबरोबरच कालव्यांच्या गळतीचा प्रश्न गंभीर बनला आहे. शेतकऱ्यांच्या जमिनी नापीक होण्याचा धोका निर्माण झाला होता. यासाठी गावोगावी निवेदने, आंदोलने, मोर्चे काढले; परंतु आमदार आबिटकर यांनी शासनाच्या तांत्रिक अडचणींची बाब पुढे करीत वर्षांनुवर्षे गळतीच्या प्रश्नाकडे जाणूनबुजून दुर्लक्ष केले.

त्यानंतर मात्र निवडणूक डोळ्यासमोर ठेवून अस्तरीकरणाचा घाट घातला आणि निकृष्ट दर्जाचे अस्तरीकरण जनतेच्या माथी मारले. परंतु हेच बूमरँग त्यांच्यावर उलटले असून अवघ्या सहा महिन्यांतच अस्तरीकरणाला तडे जाऊन पापुद्रे निघू लागले आहेत.’

गोकुळचे संचालक प्रा. किसन चौगले म्हणाले, ‘के. पी. पाटील यांनी त्यांच्या दहा वर्षांच्या कारकिर्दीत राधानगरी विधानसभा मतदारसंघाचा कायापालट केला. त्यांनी त्याची कधी प्रसिद्धी केली नाही. बिद्री साखर कारखाना जसा राज्यात भारी चालविला, तसाच हा मतदारसंघसुद्धा त्यांच्या माध्यमातून राज्यात भारी ठरेल.’

भोगावती साखर कारखान्याचे संचालक धैर्यशील पाटील-कौलवकर, बिद्रीचे संचालक राजेंद्र पाटील, फिरोजखान पाटील, अशोक चौगले यांची भाषणे झाली. संचालक उमेश भोईटे यांनी स्वागत व प्रास्ताविक केले. यावेळी संचालक राजू भाटळे, जिल्हा परिषदेचे माजी सदस्य विनय पाटील, दीपक किल्लेदार, भगवान पाटील आदींसह कार्यकर्ते मोठ्या संख्येने उपस्थित होते. नाना पाटील यांनी आभार मानले.