Jausingpur News : शिरोळ तालुक्यातील शेतकऱ्यांमागे अवकाळीचे दुष्टचक्र कायम आहे. दोन दिवसांपूर्वी झालेल्या अवकाळी पावसाने शाळू पिकाला मोठा फटका बसला. पोटरीला आलेले पीक जमीनदोस्त झाल्याने शेतकऱ्यांचे आर्थिक नुकसान होणार आहे.

बाजारात ज्वारीचे दर वाढत असताना आशावादी शेतकऱ्यांच्या पदरी अवकाळीने निराशा टाकली आहे. साखर कारखान्यांचा हंगाम सुरू झाल्यानंतर खोडवा ऊस कारखान्याला पाठवून शाळू, हरभरा, गहू अशी पिके घेण्याकडे शेतकऱ्यांचा ओढा होता.

रब्बीची वेळेत पेरणी करून हाताला आलेले शाळू पीक अवकाळीच्या फटक्यात जमीनदोस्त झाले आहे. सात ते आठ फुटांपर्यंत पिकाची वाढ झाली. पोटरी पडण्याच्या मार्गावर पीक असतानाच शनिवारी (ता. ६) रात्री झालेल्या अवकाळीने शेतकऱ्यांचा भ्रमनिरास केला.

जयसिंगपूर येथील भूपाल खामकर या शेतकऱ्याला अवकाळीचा मोठा फटका बसला. पिकाचे मोठे नुकसान झाले. पोटरी पडण्याच्या काळातच अवकाळीमुळे पिकाचे नुकसान झाले.

बाजारात ज्वारीचे दर ६० ते ६५ रुपये प्रतिकिलोवर पोहोचले असताना वर्षभराची बेगमी होईल, या उद्देशाने शाळू लागवड केली. दोन-अडीच महिन्यांपासून पिकांची काळजी घेतली, मशागत केली, मात्र अवकाळीने यावर पाणी पडले. यामुळे शेतकरी चिंता व्यक्त करीत आहे. महसूल विभागाने पंचनामे करून नुकसानग्रस्तांना मदत देण्याची मागणी करण्यात येत आहे.