Pune News : प्लॅस्टिकच्या फुलांचे हार व गुच्छ स्वीकारणार नाही. संसदेत या फुलांच्या बंदीबाबतचा मुद्दा मांडणार आहे, असे प्रतिपादन खासदार सुप्रिया सुळे यांनी सांगितले. पोंढे (ता. पुरंदर) येथे बाजारपेठेत प्लॅस्टिक फुलांच्या अतिवापरामुळे सामान्य फूल उत्पादक शेतकऱ्यांच्या पदरी काहीच येत नसल्याची व्यथा फूल उत्पादक शेतकऱ्यांनी मांडली.

यामुळे सुळे यांनी प्लॅस्टिकच्या फुलांच्या बंदीसाठी पुढाकार घेणार असल्याचे शेतकऱ्यांना सांगितले. राजुरी पोंढे ते वाघले वस्ती या रस्ताचे भूमिपूजन व गावातील विविध विकासकामांचे उद्‌घाटन खासदार सुळे व आमदार संजय जगताप यांच्या हस्ते झाले. या वेळी त्यांनी शेतकऱ्यांशी संवाद साधला.

या वेळी खासदार सुळे म्हणाल्या, की बाजारपेठेमध्ये चीनमधून येणाऱ्या प्लॅस्टिक फुलांवर अधिक मूल्य आकारण्याची मागणी करण्याबरोबरच संसदेत प्लॅस्टिक फुलावर बंदी आणण्याबाबतचा विषय मांडणार आहे. यामुळे काही जण नाराज होतील. मात्र माझ्या फूल उत्पादक उत्पादक शेतकऱ्यांसाठी हा विषय मी मांडणार आहे.

या वेळी आमदार संजय जगताप यांनी गावातील विकासकामांसाठी ग्रामस्थांकडून केल्या जात असलेल्या पाठपुरावाचे कौतुक करून गावातील उर्वरित विकास कामांसाठी तसेच धनगर वस्तीवरील रस्त्यासाठी देखील आवश्यक निधी उपलब्ध करून दिला जाईल, असे आश्‍वासन त्यांनी दिले. विकासकामांबाबत होत असलेल्या श्रेय वादावर त्यांनी या वेळी नाराजी व्यक्त केली.

या वेळी विजय कोलते, सुदामराव इंगळे, माणिकराव झेंडे पाटील, प्रदीप पोमण, गणेश जगताप, गौरी कुंजीर, सुनीता कोलते, शहाजान शेख, पुष्कराज जाधव, सरपंच छाया सोमनाथ वाघले, उपसरपंच दीपक गायकवाड, सदस्या नंदा वाघले, मंदा लोखंडे, पंकज लोखंडे, माजी सरपंच संपत वाघले, रामदास वाघले आदी उपस्थित होते.