Nanded News : खरीप पेरणीच्या तोंडावर जिल्ह्यात बियाणे व खते अधिकच्या दराने विक्री होत असल्याच्या तक्रारी प्राप्त झाल्यानंतर जिल्हाधिकारी अभिजित राऊत यांनी बुधवारी (ता. १२) नवा मोंढा बाजारातील कृषी निविष्ठा विक्री केंद्रांना भेटी दिल्या.

या वेळी कपाशी, सोयाबीन बियाणांची उपलब्धता, विक्री याची माहिती घेऊन विक्रेत्यांना बियाणे तसेच रासायनिक खते योग्य दरात देण्याचे निर्देश दिले.

या वेळी सहायक जिल्हाधिकारी अनुष्का शर्मा, जिल्हा गुणनियंत्रण निरीक्षक बी. बी. गिरी, जिल्हा परिषदेचे मोहीम अधिकारी सचिन कपाळे, नांदेड तालुका कृषी अधिकारी सिद्धेश्वर मोळके, नांदेड पंचायत समिती कृषी अधिकारी छाया देशमुख आदी उपस्थित होते.

जिल्ह्यात आगामी खरीप पेरणी संदर्भात शेतकरी बियाणे तसेच खतांच्या खरेदीसाठी कृषी निविष्ठा विक्री केंद्रावर गर्दी करत आहेत. अशावेळी कृषी निविष्ठा विक्रेत्यांकडून कपाशी तसेच सोयाबीनच्या काही वाणांची अधिकच्या दराने विक्री करत असल्याच्या तक्रारी येत आहेत.

याबाबत जिल्हाधिकारी राऊत यांनी कृषी निविष्ठा विक्रेते, खत व बियाणे उत्पादक कंपनीचे प्रतिनिधी यांची बैठक घेऊन शेतकऱ्यांना दर्जेदार निविष्ठा पुरवठ्यासह ते योग्य किमतीत देण्याच्या सूचना केल्या होत्या. या बाबत प्रत्यक्ष खातरजमा करण्यासाठी त्यांनी बुधवारी (ता. १२) नवा मोंढा बाजारात असलेल्या कृषी निविष्ठा विक्री केंद्रांना भेट दिली.