Solapur News : शासनाच्या वतीने ‘ट्रिगर वन’ अँड ‘ट्रिगर टू’ या निकषाच्या आधारे जाहीर केलेल्या दुष्काळी तालुक्याच्या यादीत मंगळवेढ्याचा समावेश नसल्यामुळे तालुक्यातील शेतकऱ्यांतून शासनाच्या निकषाबद्दल तीव्र संताप व्यक्त केला जात आहे. मंगळवेढ्यावर केल्या जाणाऱ्या अन्यायाची परंपरा आताही कायम राहिली.

तालुक्यातील शेती नदीकाठ व कालव्यावर अवलंबून आहे. उर्वरित भाग हा जिरायत क्षेत्राशी संबंधित आहे. म्हैसाळ योजनेचे पाणी ठराविक क्षेत्राला मिळत असल्यामुळे जिरायत क्षेत्रातील शेतकरी मोठ्या प्रमाणात आहेत; मात्र यंदाच्या खरीप हंगामात पावसाने अपेक्षित हजेरी न लावल्यामुळे खरिपाचे पीक संपूर्णपणे जळून गेले आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

२५ टक्के नुकसान भरपाई देण्यासंदर्भात विमा कंपनीने सुरवातीला हुलजंती व आंधळगाव ही दोन महसूल मंडले घेतली होती. मात्र स्वाभिमानी शेतकरी संघटनेने धरणे आंदोलन तर आमदार समाधान आवताडे यांनी नियोजन मंडळाच्या बैठकीत पाठपुरावा केल्यानंतर उर्वरित मंडलांचा चौकशी करून समावेश करणार असल्याचे सांगण्यात आले.

मात्र नुकतीच ट्रिगर वन व ट्रिगर टू याचा आधार घेत दुष्काळी तालुके जाहीर केले. मात्र यात मंगळवेढ्याचा समावेश नाही. राजकीय पातळीवरून जाणूनबुजून वगळण्यात आले. तालुका कुठल्या निकषात बसला नाही, याबाबत विचारणा होत आहे.

आवताडेंनी शक्ती पणाला लावण्याची आली वेळ२०१२-१३ मध्ये दुष्काळी तालुक्याच्या यादीतून मंगळवेढा तालुक्याला वगळण्यात आले होते. परंतु तत्कालीन मुख्यमंत्र्यांच्या माध्यमातून स्व. आमदार भारत भालके यांनी प्रयत्न करून मंगळवेढ्यासाठी दुष्काळासाठीचा स्वतंत्र जीआर काढण्यास भाग पाडले. तशा पद्धतीने आपली राजकीय ताकद आमदार समाधान आवताडे यांनी सत्ताधारी पक्षाकडे लावावी, अशी मागणी जोर धरत आहे.