Satara News : जनावरांना होणाऱ्या ‘लम्पी स्कीन’ या संसर्गजन्‍य आजाराने पुन्हा डोकेवर काढले आहे. या आजाराचा सर्वाधिक फटका कोरेगाव, सातारा तालुक्यांना बसला असून, गेल्या दोन महिन्यांत जिल्हाभरात १०७६ जनावरे बाधित असून यापैकी ४२ जनावरांचा मृत्यू झाला आहे. या पार्श्वभूमीवर जिल्हा परिषदेच्‍या पशुसंवर्धन विभागाद्वारे प्रादुर्भाव रोखण्यासाठी उपाययोजना केल्या जात असल्या तरी शेतकऱ्यांचे मोठे नुकसान होत आहे.

गेल्या दोन वर्षांपूर्वी राज्यभरात लम्पीचा प्रादुर्भाव मोठ्या प्रमाणात वाढला होता. त्यानंतर जिल्हा पशुसंवर्धन विभाग लम्पीचा प्रादुर्भाव रोखण्यात यशस्वी झाले, तरी शेतकऱ्यांचे मोठे नुकसान झाले होते. त्या पार्श्वभूमीवर राज्य सरकारने नुकसानग्रस्तांना आर्थिक मदतही दिली होती.

जिल्ह्यात लसीकरणाची मोहीम प्रभावीपणे राबवण्यात आली होती. मात्र, गेल्या काही दिवसांत लम्पीचा प्रादुर्भाव पुन्हा वाढू लागला आहे. दरम्यान, सातारा जिल्ह्यात लम्पीने बाधित जनावरांची संख्या एक हजार ७६ वर गेली आहे. माण आणि वाई तालुका वगळता जिल्ह्यात आतापर्यंत ४२ जनावरांचा लम्पीने मृत्यू झाला आहे.

तर आतापर्यंत मृत्‍यू झालेल्‍या जनावरांची संख्‍या अशी : सातारा तालुक्यात सात, कोरेगाव तालुक्यात १३, खंडाळा तालुक्यात आठ, खटाव तालुक्यात तीन, महाबळेश्वर तालुक्यात दोन, जावळी तालुक्यात आठ आणि पाटण तालुक्यातील एका जनावराचा समावेश आहे.

सातारा जिल्ह्यातील स्‍थिती

लम्‍पी बाधित जनावरे एक हजार ७६

सद्यःस्थितीत उपचारार्थ जनावरे ११७

लम्पीतून बरे झालेले जनावरे ९१९

आतापर्यंत मृत जनावरे ४२