Jalgaon News : जिल्ह्यात ३४ लाख ६२ हजारांवर मतदार आहेत. मतदार याद्यांमध्ये (Voter List) तब्बल एक लाख ६३ हजार ८८९ मतदारांचे छायाचित्र ‘ब्लर’ (अस्पष्ट) आहेत.

ते फोटो काढून त्या जागी मतदारांचे नवीन फोटो टाकण्याचे आदेश राज्य निवडणूक विभागाने (State Election Department) जिल्हा निवडणूक विभागाला (District Election Department) दिले आहेत.

त्यानुसार निवडणूक विभागाने संबंधित मतदाराच्या ‘बीएलओ’ (बूथ लेव्हल अधिकारी) मार्फत मतदारांशी संपर्क साधून फोटो अपडेट करण्याचे काम सुरू केले आहे.

आगामी एक ते दीड वर्षात लोकसभा, विधानसभा निवडणूक होतील, असे चित्र आहे. सोबतच जिल्हा परिषद, पंचायत समिती, महापालिका, पालिकांचाही निवडणुका आहेत.

त्यासाठी निवडणूक आयोगाने मतदार याद्या अपडेट करण्याचे आदेश दिले आहेत. आयोगाने नुकताच जळगाव जिल्ह्यातील मतदार याद्यांचे सर्वेक्षण केले. त्यात अनेक बाबींवर बोट ठेवून त्या दुरुस्तीचे आदेश दिले आहेत.