Rabi Season : वर्षातील बाराही महिने वाटाणा म्हणजेच मटार ला मागणी असते.  वाटाणा पिकाची लागवड राज्यात बहुतांशी भागात खरीप व रब्बी या दोन्ही हंगामात मोठ्या प्रमाणात केली जाते.  वाटाणा थंड हवामानात वाढणारे पीक आहे. कडाक्याची थंडी व धुके यामुळे पिकावर दुष्परिणाम होतो. पीक फुलोऱ्यात असताना उष्ण हवामान असल्यास शेंगात दाणे भरत नसल्याने प्रत कमी होते.  

हंगाम आणि विभागानुसार शिफारस केलेल्या जातीची लागवडीसाठी निवड करावी. हवामान बदलानुसार पीक पद्धतीचा वापर करावा. पीक फुलोऱ्यावर असताना व फळांची वाढ होत असताना नियमित पाणी पुरवठा आवश्यक असतो. या काळात पाण्याचा ताण पडल्यास फुलगळ, फळधारणा न होणे अशा प्रकारच्या समस्या निर्माण होऊ शकतात. हे टाळण्यासाठी या काळात पाण्याचे योग्य नियोजन करावे. 

हवामान

जमिनीतील उपलब्ध ओलावा, पिकांची अवस्था व तेथील हवामान या मुद्द्याचा सखोल विचार करून शक्य असल्यास सूक्ष्म सिंचन पद्धतीचा वापर करून पाणी व्यवस्थापन करावे. पिकाच्या मुख्य वाढीच्या अवस्थेमध्ये तापमानात वाढ झाल्यास बाष्पीभवनाचा दर वाढतो.

तो कमी करण्यासाठी आणि जमिनीतील ओलावा टिकवण्यासाठी योग्य बाष्परोधकाची  फवारणी करावी. त्याच प्रमाणे जमिनीवर आच्छादन केल्यास बाष्पीभवन कमी होऊन उत्पादन चांगले येते.

लागवड 

वाटाणा लागवडीसाठी मध्यम ते भारी, चांगल्या निचऱ्याची जमीन निवडावी. लागवडीपूर्वी प्रति हेक्‍टरी दहा टन शेणखत मिसळावे. लागवडीसाठी बोनव्हिला, अर्केल, फुले प्रिया या जातींची निवड करावी. लागवड ऑक्‍टोबर, नोव्हेंबर महिन्यात करावी. लागवड सरी-वरंबे किंवा सपाट वाफ्यामध्ये ३० x १५ सें. मी. अंतराने करावी.

टोकण पद्धतीने लागवड करताना ४० किलो बियाणे लागते. पेरणी पद्धतीसाठी ८० किलो बियाणे लागते. लागवडीपूर्वी मातीपरीक्षणानुसार १५ किलो नत्र, ६० किलो स्फुरद आणि ६० किलो पालाश द्यावे. लागवडीनंतर एक महिन्याने दहा किलो नत्र खत प्रति हेक्‍टरी द्यावे.

माहिती आणि संशोधन - महात्मा फुले कृषी विद्यापीठ, राहुरी