Pune News: शेतकऱ्यांना विहीरीतील पाणी उपसण्यासाठी मदत मिळावी म्हणून राज्य सरकारच्या डॉ. बाबासाहेब आंबेडकर कृषी स्वावलंबन योजनेतून पंपसंच खरेदीसाठी ९०% पर्यंत अनुदान देत आहे. या अनुदानाची रक्कम जास्तीत जास्त ४० हजारांपर्यंत असणार आहे. या योजनेअंतर्गत शेतकऱ्यांना १० अश्वशक्ती (HP) क्षमतेपर्यंतचे डिझेल किंवा विजेवर चालणारे पंपसंच खरेदी करता येणार आहे.

ज्या शेतकऱ्यांकडे नवीन विहीर, दुरुस्त केलेली जुनी विहीर, प्लास्टिक अस्तर केलेले शेततळे किंवा इतर पाण्याचा स्रोत आहे, अशा शेतकऱ्यांना प्राधान्याने पंपसंच देण्यात येणार आहे. यामुळे शेतीसाठी लागणाऱ्या पाण्याचा उपसा करणे सोपे होणार आहे. तसेच, पिकांना वेळेवर पाणी देता येईल, त्यामुळे उत्पादन वाढेल आणि शेतकऱ्यांचा नफा जास्त होईल.

शेतकऱ्यांना मिळणारे फायदे

• सरकारकडून ९०% अनुदान मिळाल्यामुळे पंपसंच खरेदीचा खर्च कमी होईल.

• पंपसंचाद्वारे विहीर, शेततळे किंवा इतर स्रोतांतून पाणी सहजपणे काढता येईल.

• योग्य वेळी पाणी मिळाल्याने पिकांची वाढ चांगली होईल आणि नफा वाढेल.

• कार्यक्षम पंपसंचामुळे पाणी कमी वाया जाईल व पाणीटंचाई कमी होईल.

योजनेसाठी पात्रतेच्या अटी

• अर्जदार शेतकरी अनुसूचित जाती / नवबौद्ध प्रवर्गातील असावा.

• महाडीबीटी पोर्टलवरील अर्जासाठी “प्रथम येणाऱ्यास प्रथम प्राधान्य” ही अट लागू आहे.

• दारिद्र्यरेषेखालील (BPL) शेतकऱ्यांना प्रथम प्राधान्य दिले जाईल.

• BPL शेतकऱ्यांना ६ हेक्टर मर्यादा लागू नाही.

• इतर शेतकऱ्यांकडे ०.४० ते ६ हेक्टर दरम्यान शेती असणे आवश्यक.

• दुर्गम भागातील शेतकऱ्यांकडे ०.४० हेक्टरपेक्षा कमी जमीन असल्यास, एकत्र अर्ज केल्यास पात्रता मिळते.

• राज्य सरकारने कृषी विभागाच्या सर्व योजनांसाठी शेतकरी ओळख प्रमाणपत्र अनिवार्य केले आहे.

आवश्यक कागदपत्रे

• शेतकरी ओळख प्रमाणपत्र (Farmer ID)

• जात प्रमाणपत्र

• बँक खाते आधार कार्डशी लिंक असणे आवश्यक

• BPL प्रमाणपत्र (दारिद्र्यरेषेखालील असल्यास)

• शेतकरी ओळख क्रमांकामुळे सर्व माहिती उपलब्ध होत असल्याने सातबारा, ८ अ आणि आधार कार्डची गरज नाही.

अर्जाची प्रक्रिया

ज्या शेतकऱ्यांना या योजनेचा लाभ घ्यायचा आहे, त्यांनी https://mahadbt.maharashtra.gov.in  या संकेतस्थळावर अर्ज करावा.
अधिक माहितीसाठी तालुका कृषी अधिकारी कार्यालयाशी संपर्क साधावा.