Kolhapur News : शेतकऱ्यांच्या आयुष्यातील साहित्याचे स्थान अधोरेखित करत विविध सांस्कृतिक गीतांचा नजराणा पेश करत जयसिंगपूर येथे बाराव्या अखिल भारतीय मराठी शेतकरी साहित्य संमेलनाचा रविवारी (ता. ९) समारोप झाला.

येथील शेती अर्थ प्रबोधिनी आणि शरद कृषी महाविद्यालय, यड्रावकर शिक्षण व उद्योग समूह जयसिंगपूर यांच्या संयुक्त विद्यमाने हे संमेलन झाले. अंतिम दिवशी शेतकरी भक्तिगीत, शेतकरी गझल, मुशायरा आणि शेतकरी गर्जना गीताने शेतकऱ्यांच्या जीवनावर प्रकाश टाकला.

रविवारी अक्षांशस्वर, दिव्यदृष्टी कलाकार मुंबई यांच्या वतीने शेतकरी भक्तिप्रभात या कार्यक्रमाचे दीपप्रज्वलन स्वरूपा पाटील यड्रावकर यांनी केले. या वेळी संगीत संचालक बिपीन वर्तक, महेश उमरानिया, संध्या उमरानिया, प्रशांत बानिया, जयेश बानिया, देविदास पालवे, हर्षवर्धन वर्तक, महेश नाईक यांनी आपल्या सुरेल आवाजात शेतकऱ्यांच्या जीवनावर प्रकाश टाकला.

सातव्या सत्राची सुरुवात शेतकरी गझल, मुशायरा या कार्यक्रमाने झाली. अध्यक्षस्थानी दिवाकर जोशी होते. या वेळी सुनील बावणे, चंद्रकांत कदम, नंदकिशोर ठोंबरे, आत्माराम जाधव, यशवंत मस्के, अविनाश कासांडे, अजित सपकाळ, विरेंद्र बेडसे, विजय पाटील यांनी आपल्या गझलांतून शेतकऱ्यांची व्यथा, शेतकऱ्यांची क्रांती आणि वाटचाल यावर प्रकाश टाकला.

आठव्या सत्रात संजय पाटील यड्रावकर यांच्या हस्ते पारितोषिक, पुरस्कार वितरण समारंभ झाला. या वेळी अखिल भारतीय शेतकरी साहित्य चळवळ उपक्रमाच्या वतीने घेण्यात ‘शेतीमालाचा भाव’ या विषयावरील लेखन स्पर्धेतील विजेत्यांना बक्षीस वितरण करण्यात आले.

शेतकऱ्यांच्या गर्जना गीताने समारोप झाला. या वेळी सावकर मादनाईक, बबन यादव आदींची भाषणे झाली. सुभाषसिंह रजपूत, संजय नांदणे, ॲड. मनोज पाटील, राजेंद्र फंड, गंगाधर मुटे, संगीता थोरात यांच्यासह राज्यातून आलेले दिग्गज साहित्यिक, शेतकरी उपस्थित होते. ॲड. सतीश बोरुळकर यांनी आभार मानले.