Nagar News : ‘‘पंतप्रधान कुसूम योजनेअंतर्गत सौर पंपासाठी निवड झाल्याचे सांगत फसवे संदेश देऊन शेतकऱ्यांची आर्थिक फसवणूक करण्याचे प्रकार राज्यात सुरूच आहे. मात्र फसव्या संदेश देणाऱ्याकडे सौरपंपाच्या लाभासाठी अर्ज केलेल्या शेतकऱ्यांची संपूर्ण माहिती बनावट संकेतस्थळ करणाऱ्यांकडे जातेच कशी, असा प्रश्‍न शेतकऱ्यांना पडला आहे. तसेच या बाबत वरिष्ठ पातळीवर चौकशी होण्याची अपेक्षाही शेतकऱ्यांकडून व्यक्त होत आहे.

विजेचा प्रश्‍न सुटण्यासाठी राज्यातील शेतकऱ्यांना कृषी वापरासाठी पारेषण विरहित सौर कृषिपंप अनुदान तत्त्वावर उपलब्ध करून देण्यात येत आहेत. या योजनेअंतर्गत ३, ५, ७.५ एचपी क्षमतेचे सौरकृषिपंप ९० ते ९५ टक्के अनुदानावर उपलब्ध आहेत. राज्य शासनाने या योजनेसाठी महाऊर्जास १ लाख ४ हजार ८२३ सौरकृषिपंपांसाठी मान्यता दिली.

महाऊर्जाकडून आतापर्यं ७५ हजार ७७८ सौरकृषिपंप बसवले आहेत. काही दिवसांपासून मात्र कुसुम सोलर योजनेच्या सरकारी संकेस्थळासारखे हुबेहूब नकली संकेतस्थळ तयार करून योजनेच्या लाभासाठी अर्ज भरलेल्या शेतकऱ्यांना स्वयंसर्वेक्षण करण्याबाबत बनावट संदेश देऊन शेतकऱ्यांची आर्थिक फसवणूक करण्याचे प्रकार काही दिवसांपासून सुरू आहे. विशेष महाउर्जाकडे अर्ज करताना शेतकऱ्यांच्या अर्जाचा दहा अंकी एमके नंबर, आधार नंबर, मोबाइल नंबर, पत्ता, फोटो ही माहिती दिली जाते.

ती सर्व माहिती नकली संकेतस्थळ करणाऱ्यांकडे उपलब्ध आहे. त्यामुळे केवळ शेतकरी आणि सरकारी संकेतस्थळाकडे गुप्त असलेली माहिती नकली संकेतस्थळ तयार करणाऱ्यांकडे जातेच कशी असा प्रश्‍न आता शेतकऱ्यांना पडला आहे. तालुका पातळीवरूनही सर्वेक्षण करायचे असून, त्यासाठीही एक ते दीड हजार रुपये थेटपणे मागितले जात आहेत.

त्या लोकांकडेही अर्ज करणाऱ्या शेतकऱ्यांच्या याद्या आल्या कुठून, अशी शंका आता शेतकरी उपस्थित करू लागले आहे. तसेच सरकारी यंत्रणेतूनच यात कोणी सामील तर नाही ना, अशी शंका उपस्थित केली जात असून, माहिती बाहेर गेली कशी याची वरिष्ठ पातळीवर चौकशीची मागणी शेतकरी करत आहेत.