Kolhapur News : इचलकरंजी येथील देशभक्त रत्नाप्पाण्णा कुंभार पंचगंगा सहकारी साखर कारखाना लिज युनिट श्री रेणुका शुगर्स लि. या कारखान्याने दर देण्यात राज्यात मुसंडी मारली आहे. यंदाच्या हंगामात गळितास येणाऱ्या उसाला उच्चांकी प्रतिटन एफआरपीसह ३३०० रुपये दर विनाकपात जाहीर केला आहे. गेल्‍या दोन महिन्यांपासून सुरू असलेल्या शेतकरी संघटनांच्या आंदोलनाची किनार या उच्चांकी दराला आहे.

गुरुवारी (ता. २३) ऊस दर प्रश्‍नी महामार्ग रोको आंदोलन झाले. जिल्ह्यातील कारखान्यांनी मागील हंगामातील दर व येणाऱ्या हंगामाचा दर जाहीर करून त्या बाबतचे पत्र प्रशासनाला दिल्‍यानंतरच कारखाने सुरू केले जातील अशी भूमिका स्वाभिमानीसह अन्य शेतकरी संघटनांनी घेतली. या नुसार अनेक कारखान्यांनी अशी पत्रे जिल्‍हाधिकाऱ्यांना दिली.

पंचगंगा कारखान्याने मात्र पत्र न दिल्याने स्वाभिमानीच्या कार्यकर्त्यांनी शनिवारी (ता. २५) दिवसभर कारखान्यासमोर आंदोलन केले. यानंतर सायंकाळी कारखान्याने या दराची घोषणा केली. कै. देशभक्त रत्नाप्पाण्णा कुंभार यांनी स्थापन केलेला हा कारखाना आहे. सध्या रेणुका शुगर्स या कंपनीने तो चालविण्यास घेतला आहे.

कारखान्याचे सध्‍याचे अध्यक्ष पी. एम. पाटील यांनी रेणुका शुगर्सचे कार्यकारी संचालक एस. बी. नेर्लीकर, वरिष्ठ व्यवस्थापक केन मुगळखोड, सी. एस. पाटील, एन. टी. बन्ने, संचालक धनगोंडा पाटील, एम. आर.पाटील, प्रमोद पाटील, प्रभारी कार्यकारी संचालक नंदकुमार भोरे यांच्या उपस्‍थितीत कारखाना उच्चांकी दर देत असल्याचे जाहीर केले.

शेतकरी संघटनांच्या आंदोलनानंतर अनेक कारखान्यांनी पुढील हंगामाचा दर ३२०० रुपयांपर्यंत जाहीर केला आहे. अनेक कारखान्यांनी यापूर्वी ३००० ते ३१०० रुपये पर्यंत एफआरपीसहीत दर जाहीर केला आहे. या बाबतचे पत्रही त्‍यांनी प्रशासनास दिले आहे. या पार्श्वभूमीवर या सर्व कारखान्यांपेक्षा आणखीन एक पाऊल पुढे घेत कारखाना व्‍यवस्‍थापनाने हा उच्चांकी दर जाहीर केला.

या घोषणेनंतर ऊस उत्पादकांत समाधान पसरले आहे. गेले दोन महिने ऊस पट्ट्यात शेतकरी संघटनांनी आंदोलन तीव्र केले होते. या पार्श्वभूमीवर बहुतांशी कारखान्यांनी ३००० रुपयांच्या वर दर देत ऊस उत्पादकांना आकर्षित करण्याचा प्रयत्न केला. दराच्या या स्पर्धेत सध्या तरी पंचगंगा कारखान्याने बाजी मारली आहे.