Sangli News : शिराळा तालुक्यात पावसाने उघडीप दिली असली, तरी शेतात अद्याप पाणी साचून असल्याने शेतकऱ्यांना कुरीच्या सहाय्याने पेरणी करणे जवळपास शक्य नाही. परिणामी भात वाफ्यात रोप लागणच करावी लागणार असल्याचे चित्र आहे. परिणामी शेतकऱ्यांसमोर भात पेरणीचे नवे आव्हान उभे ठाकले आहे.

शिराळा तालुक्यात ११ मे रोजी पहिल्यांदा पूर्वमोसमी पावसाने हजेरी लावली. शेतकऱ्यांच्या आशा पल्लवीत झाल्या होत्या. खरीप पेरणीपूर्व मशागतीला गती आली होती. १८ पासून या पावसाने सलग आठ दिवस दमदार उपस्थिती लावली. धुव्वाधार पावसाने तालुक्यातील पेरण्या ठप्प झाल्या. पेरणीचे गणित बिघडले.

आजअखेर भातवाफ्यात पाणी असल्याने तिथे पेरणी करता येणे शक्य नाही. अद्याप अनेक ठिकाणी रब्बीची पिके पाण्यातच आहेत. पावसामुळे शेतात जाणाऱ्या सर्व वाटा बंद झाल्या आहेत. ट्रॅक्टरसारखे वाहन शेतात जाणे दुरापास्त झाले आहे.

शेतकऱ्यांसमोर पेरणीचे मोठे संकट उभे ठाकले आहे. दुसरीकडे, तालुक्यात पावसाचा जोर कमी झाला असला, तरी आणखी पंधरा दिवस तरी शेतात वाफसा येणार नाही. तोपर्यंत आणखी पाऊस पडला तर पेरणीची कोणतीही कामे करताच येणार नाहीत.

परिणामी पेरणीसाठी राने कशी तयार करावीत, याची चिंता शेतकऱ्यांना लागली आहे. मॉन्सूनच्या पावसाच्या हजेरीमुळे तर भातवाफ्यात रोप लागणीशिवाय पर्याय नाही. शेतकरी आता दूरदृष्टी ठेवून भाताचा तरवा टाकत असल्याचे चित्र आहे.

}शिराळा तालुक्यातील खुंदलापूर, मणदूर, मिरुखेवाडी, सोनवडे, आरळा, खोतवाडी, पाजगणी, टेटमेवाडी परिसरामध्ये प्रामुख्याने भातशेती मोठ्या प्रमाणात केली असून साधारणतः १२०० ते १५०० हेक्टरमध्ये लागणी होतात. क्षेत्रात वाढीची शक्यता आहे.