Sindhudurg Weather Update: सिंधुदुर्ग जिल्ह्यात पावसाचा धडाका सुरूच असून सोमवार (ता. ३) सकाळपासून जिल्ह्यात पावसाचा जोर अधिकच वाढला आहे. सावंतवाडी आणि दोडामार्ग तालुक्यात मुसळधार पाऊस सुरू आहे. दमदार पावसामुळे भातरोप पुनर्लागवडीच्या कामांना गती प्राप्त झाली आहे. दरम्यान हवामान विभागाने ५ जुलैपर्यंत मुसळधार पावसाचा अंदाज दिला आहे.

जिल्ह्यात २४ जूनला मॉन्सूनचे पुनरागमन झाले. त्यानंतर संपूर्ण जिल्ह्यात जोरदार पाऊस सुरू आहे. एक-दोन दिवसांचा अपवाद वगळता जिल्ह्यात सातत्याने पाऊस पडत आहे.

शनिवारी (ता. १) जिल्ह्याच्या काही भागांत पावसाच्या जोरदार तर काही भागात मध्यम सरी कोसळल्या. त्यानंतर सोमवार पहाटेपासून जिल्ह्याच्या काही भागांत पावसाच्या जोरदार सरी पडत आहेत.

सावंतवाडी, कुडाळ, दोडामार्ग या तालुक्यांना पावसाने अक्षरक्ष झोडपून काढले. तर कणकवली, वैभववाडी, वेंगुर्ला, मालवण या तालुक्यांमध्ये पावसाच्या सरीवर सरी पडत आहेत. काही भागात सतत पाऊस पडत असल्यामुळे नदीनाल्यांच्या पाणीपातळीत चांगली वाढ झाली आहे.

पावसामध्ये सातत्य असल्यामुळे शेतकऱ्यांनी भातरोप पुनर्लागवडीच्या कामांना सुरुवात केली आहे. शेतमळ्यांमध्ये शेतकरी पुनर्लागवड करीत असल्याचे चित्र गावागावात पाहायला मिळत आहे.

पावसाचे सातत्य समाधानकारक

यावर्षी मॉन्सून आगमनानंतर एक दोन दिवसच पाऊस झाला. त्यानंतर हलक्या सरी पडत होत्या. पावसात सातत्याचा अभाव दिसला. लहरी पावसाचा मोठा परिणाम यावर्षीच्या खरिपावर झाला आहे. उशिराने भातरोपवाटिका तयार करण्यात आल्या. त्यामुळे पुनर्लागवडदेखील लांबणार आहे. मात्र सध्या पावसातील सातत्यामुळे शेतकऱ्यांमध्ये समाधानाचे वातावरण आहे.

मुसळधार पावसाचा अंदाज

जिल्ह्यात सध्या जोरदार पाऊस पडत असून नदी-नाल्यांच्या पाणीपातळीत चांगलीच वाढ झाली आहे. त्याचत आता हवामान विभागाने सुधवारपर्यंत (ता. ५) मुसळधार पावसाचा अंदाज दिला आहे.