Rain Forecast Kolhapur : मागील अनेक दिवसांपासून उघडीप दिलेल्या पावसाने मागच्या २४ तासांपासून जोरदार हजेरी लावली. दिवसभर उन्हाने घामाघूम झालेल्या नागरिकांना यामुळे दिलासा मिळाला. १६ ऑगस्टपासून वाहन कोल्हा असलेले मघा (सासूंचा पाऊस) नक्षत्र सुरू झाले. तरीही पावसाची दमदार सुरुवात झाली नव्हती.

परंतु, काल(ता.२४) रात्री नऊनंतर रात्री उशिरापर्यंत पावसाने जोरदार हजेरी लावत सर्वत्र पाणीच पाणी केले. यामुळे शहरात ठिकठिकाणी सखल भागात पाण्याची तळी साचली. अचानक पडलेल्या पावसाने नागरिकांसह वाहनधारकांची तारांबळ उडाल्याचे चित्र पाहायला मिळाले.

दरम्यान जिल्ह्यात होत असलेल्या पावसाने पिकांना चांगलाच दिलासा मिळाला आहे. माळरानावरील खरिपाच्या पिकांना होत असलेल्या पावसाने बुस्ट मिळाला आहे. कोल्हापूर, सांगली आणि सातारा जिल्ह्यातील घाट माथ्यावर पावसाने जोर धरला आहे. कोल्हापुरातील राधानगरी, करवीर, शाहूवाडी, पन्हाळा तालुक्यात रात्रभर पावसाची रिपरिप सुरू होती. २५ ऑगस्टपर्यंत असाच पाऊस राहणार असल्याचे बोलले जात आहे.

पश्‍चिम महाराष्ट्र आणि विदर्भाच्या काही भागांत पाऊस होणार असल्याची माहिती हवामान विभागाकडून व्यक्त करण्यात येत आहे. कालपासून पश्चिम महाराष्ट्रातील अनेक भागांत जोरदार पाऊस पडत आहे.

तसेच विदर्भातही पावसाची शक्यता हवामान विभागाने वर्तवली आहे. शुक्रवारी (ता.२३) सकाळी आठ वाजेपर्यंत बुलडाण्यातील जांभूळधाबा येथे सर्वाधिक १२५ मिलिमीटर पाऊस पडल्याची नोंद झाली. त्यामुळे शेतात चांगलेच पाणी साचल्याने ओढे, नाले भरून वाहू लागले आहेत. तर काही ठिकाणी जमिनीही खरडल्या आहेत.

कोकणात पावसाचा जोर

रत्नागिरी आणि सिंधुदुर्ग जिल्ह्यात पावसाचा जोर वाढला आहे. तसेच रायगडमधील माणगाव येथे हलका पाऊस पडला. तर रत्नागिरीतील आंजर्ले येथे ४५ मिलिमीटर तर वेळवी ३८, कोतवडे ३९, दापोली ३८, तुळसानी येथे ३१ मिलिमीटर पाऊस झाला. उर्वरित भागात ढगाळ वातावरण असून तुरळक ठिकाणी शिडकावा झाला.