Sindhudurg News : जिल्ह्यातील बापर्डे (ता. देवगड) येथील आंबा बागायतदार बाबूराव वामन राणे यांच्या बागेत ६०५ ग्रॅम वजनाचा हापूस आंबा आढळून आला आहे. या भागात आढळून आलेले हे सर्वाधिक वजनाचे फळ आहे.

जिल्ह्यात सध्या आंबा हंगाम सुरू आहे. आंबा काढणीचे काम गतीने सुरू आहे. महिनाभरापूर्वी बापर्डे येथील पुरुषोत्तम नारायण धुरे यांच्या बागेत ५२५ ग्रॅम वजनाचा हापूस आंबा सापडला होता.

कृषी विभागाने या फळाच्या वजनाची खात्री केली होती. बापर्डे येथील आंबा बागायतदार व रामेश्वर ॲग्रो टुरिझम संचालक बाबूराव वामन राणे यांच्या बागेतील आंबा काढणीचे काम सध्या सुरू आहे.

आंबा काढणी करीत असताना श्री. राणे यांना काही झाडांवरील फळे नियमित आंब्यांपेक्षा आकाराने मोठी दिसून आली. त्यामुळे त्यांनी या फळांचे वजन केले असता एका फळांचे वजन ६०५ ग्रॅम आढळून आले. ४५० ग्रॅम ते ६०० ग्रॅमपर्यंत सरासरी फळे दिसून येत आहेत.

साधारणपणे आंबा फळाचे वजन ३०० ग्रॅम ते ३५० ग्रॅम असते. या बागेचे व्यवस्थापन श्री. राणे हे नैसर्गिकरीत्या व सेंद्रिय पद्धतीने करतात. या फळांची माहिती मिळाल्यानंतर तालुका कृषी विभागाचे अमोल सदावर्ते, कृषी सहायक एस. व्ही. उलपे, मंडळ कृषी अधिकारी प्रदीप खाडे यांनी प्रत्यक्ष जाऊन पाहणी केली. वजनाची देखील खात्री केली.