Nashik News : शेतकऱ्यांना नुकसानभरपाईत वाढ, वीजबिल व पीक कर्जमाफी आदी मागण्यांसाठी निफाड शहरातील शांतीनगर चौफुलीवर मंगळवारी (ता. ५) निफाडचे उपनगराध्यक्ष अनिल कुंदे यांच्या नेतृत्वाखाली गारपीटग्रस्त शेतकऱ्यांनी तासभर रास्ता रोको आंदोलन करत आक्रोश व्यक्त केला.

या वेळी मागण्यांचे निवेदन नायब तहसीलदार सुजाता वायाळ यांना देण्यात आले. शेतकरी अडचणीत सापडल्याने शेतकऱ्यांचा रोष दिवसेंदिवस वाढत असल्याचे या निमित्ताने समोर आले आहे.

निफाड तालुक्यात ता. २६ नोव्हेंबर रोजी गारपीट व मुसळधार पावसामुळे द्राक्षे, कांदा, ऊस व इतर भाजीपाला या पिकांची वाताहात झाली. कुठलेच पीक हातात राहिलेले नाही अशा परिस्थितीत जगणं मुश्कील झाले आहे.

या पार्श्‍वभूमीवर शासनाने जाहीर केलेली नुकसानभरपाई अत्यल्प असून, त्यात वाढ करण्यात यावी. विविध कार्यकारी सोसायटी व बँकांचे असलेले पीककर्ज माफ करण्यात यावे, शेतीसाठी असलेले वीजबिले माफ करण्यात यावे, चालू कर्ज माफ करून नवीन पीककर्ज तत्काळ देण्यात यावे, आदी प्रमुख मागण्या करण्यात आल्या.

तासभर ‘रास्ता रोको’ केल्याने वाहनांच्या मोठ्या लांबच लांब रांगा लागल्या होत्या. या आंदोलनानंतर प्रशासनाला निवेदन उपनगराध्यक्ष अनिल कुंदे, शिवाजी ढेपले, हरिश्‍चंद्र भवर, रावसाहेब गोळे, भाऊसाहेब कापसे, देवदत्त कापसे, नंदू कापसे, दीपक गाजरे, संपत व्यवहारे, जानकीराम धारराव, श्याम गोळे, नंदू पडोळ, माणिक गायकवाड, बाळासाहेब शेळके यांच्यासह शेतकरी बांधव उपस्थित होते.