Kolhapur News : श्री गुरुदत्त शुगर्सने नेहमीच शेतकरी हिताचा कारभार केला आहे. त्यांच्या प्रत्येक सुख-दुःखात कारखाना त्यांच्या पाठीमागे खंबीरपणे उभा राहिला आहे.

त्यामुळे कारखाना व शेतकरी यांच्यातील ऋणानुबंध आणखी घट्ट झाले असून त्यांच्या पाठबळावर ‘गुरूदत्त शुगर्स’ने साखर उद्योगात गरूडभरारी घेतली असल्याचे गौरवोद्गार टाकळीवाडी (ता. शिरोळ) येथील श्री गुरुदत्त शुगर्सचे अध्यक्ष माधवराव घाटगे यांनी काढले.

प्रजासत्ताक दिनानिमित्त रविवारी (ता. २६) कारखाना कार्यस्थळावर कारखान्याच्या ‘गुरुदत्त किसान कार्ड’ योजनेअंतर्गत शेतकऱ्यांना वैदयकीय कामी दोन लाख रुपयांचे धनादेश वाटप कार्यक्रम प्रसंगी ते बोलत होते.

गुरुदत्त किसान कार्ड योजनेअंतर्गत आतापर्यंत दहा हजार शेतकऱ्यांनी लाभ घेतला असून २३४ शेतकऱ्यांना विविध प्रकारच्या शस्त्रक्रिया व उपचारांसाठी प्रत्यक्ष मदत झाली आहे.

गळीत हंगाम २०२३-२४ मध्ये या योजनेतून ९४ शेतकऱ्यांना वैद्यकीय कामी १६ लाख २५ हजार रुपयांची मदत झाली आहे. या वेळी एक्झिक्युटिव्ह डायरेक्टर राहुल घाटगे, संचालक शिवाजीराव माने-देशमुख, शिवाजी सांगले, बबन चौगुले, धोंडिराम नागणे, अण्णासाहेब पवार आदी उपस्थित होते.