Ajara Farmers : आजरा तालुक्यात गावात वानरांची टोळी तर शेतात गव्यांचे कळप धुडघूस घालत आहेत. यामुळे शेतकरी हैराण झाला असून त्यांचा बंदोबस्त करावा अशी मागणी करीत आहेत. धो धो पडणारा पाऊस आणि जंगली जनावरांचा धुडगुस मोठ्या प्रमाणात होत असल्याने शेतकऱ्यांच्या हातात असलेले पीक डोळ्या देखत बरबाद होत असल्याने शेतकऱ्यांसमोर दुसरा पर्याय उरला नाही.

नदीकाठानजीकची पिके पाण्याखाली गेली आहेत. ओढे व नाले शेतात घुसल्याने शेतीचे नुकसान झाले आहे. यामध्ये वानरांची टोळी व गव्यांचे कळप सक्रिय झाले आहेत. वानरांचे कळपाने गावात धुडघुस घालत आहेत. घरांच्या छप्परावर उड्या मारणे, कौले फोडणे, परस बागेतील फुले व फळांच्या झाडांची नासधुस करणे असे प्रकार करत आहेत.

पेरणोली, आजरा, आरदाळ, हाळोली यासह अन्य गावात त्यांच्या प्रतापाने ग्रामस्थ हैराण झाले आहेत. दरम्यान गव्यांच्या कळपांनी पेरणोली पंचक्रोशीसह तालुक्याच्या पश्चिम भागातील शेतीत नुकसान करण्यास सुरवात केली आहे. पेरणोली येथील बांबर नावाच्या शेतात नुकतीच भात रोपलावण केली होती. या रोपलावणीत गव्यांच्या कळपाने धुडघुस घातला. यामुळे विष्णु दारुडकर, शिवाजी दारुडकर व मारुती दारुडकर या शेतकऱ्यांचे नुकसान झाले आहे.

एमेकोंडच्या जंगलात टस्कर

एमेकोंडच्या जंगलात गत पंधरा दिवस टस्कर तळ ठोकून आहे. त्यांने गुरुवारी (ता.१) द्रोण अॅकॅडमीतील पाण्याची टाकी फोडली आहे. अॅकेडमीचे मालक प्रकाश सोले यांचे नुकसान झाले आहे.