Parbhani News : परभणी ः जिल्ह्यातील ९ तालुक्यांतील ८३४ गावांतील ५ लाख २९ हजार ७६१ शेतकऱ्यांना अतिवृष्टी व पूरस्थितीचा फटका बसला आहे. जिरायती, बागायती, फळपिके मिळून ४ लाख २ हजार २१३ हेक्टरवरील पिकांचे ३३ टक्क्यांच्यावर नुकसान झाले आहे. नुकसानग्रस्तांना आर्थिक मदत देण्यासाठी ५४८ कोटी ५९ लाख ८९ हजार २१२ रुपयाच्या निधीची आवश्यकता आहे.

पुरामुळे २२ गावांतील दीड हजारांवर शेतकऱ्यांची ७७३ हेक्टवर जमीन खरडून गेली आहे. त्यासाठी ३ कोटी ६७ लाख रुपयांवर निधीची गरज आहे, अशी माहिती महसूल विभागाच्या सूत्रांनी दिली. जिल्ह्यात रविवार (ता. १) ते गुरुवार (ता. १९) या दरम्यान झालेल्या अतिवृष्टी व पुरामुळे नुकसान झालेल्या क्षेत्राचे संयुक्त पंचनामे पूर्ण झाले आहेत. त्यानुसार परभणी जिल्ह्यात ८३४ गावांतील ५ लाख २९ हजार ७६१ शेतकऱ्यांच्या ४ लाख २ हजार १२३ हेक्टरवरील पिकांचे ३३ टक्क्यांच्यावर नुकसान झाले आहे.

सर्व नऊ तालुक्यांतील जिरायती पिकांचे ४ लाख १ हजार ८८.५५ हेक्टर, पाथरी तालुक्यातील बागायती पिकांचे ६७३ हेक्टर, जितूर, पाथरी, गंगाखेड तालुक्यांतील फळपिकांचे ३६१.५० हेक्टर नुकसान झाले आहे. नुकसान झालेल्या जिरायती पिकांसाठी प्रतिहेक्टरी १३ हजार ६०० रुपयांनुसार ५४५ कोटी ४८ कोटी ४ हजार २१२ रुपये, बागायती पिकांसाठी प्रतिहेक्टरी २७ हजार रुपयांनुसार १ कोटी ८१ लाख ७१ हजार रुपये, फळपिकांसाठी प्रतिहेक्टरी ३६ हजार रुपयांनुसार १ कोटी ३० लाख १४ हजार रुपये मिळून एकूण ५४८ कोटी ५९ लाख ८९ हजार २१२ रुपयांच्या निधीची आवश्यकता आहे.