संदीप साळवे

जव्हार : तालुक्यातील दुर्गम भागातील नागरिकांचा उदरनिर्वाह पावसाच्या पाण्यावर पीक घेऊन होत आहे. यात पावसाळ्याचे चार महिने संपले की मिळेल ते मजुरीकाम करून प्रपंच चालविला जातो.

या भागात रोजगार हमी योजनेच्या कामाचे वरदान असल्याने रोजगार उपलब्ध होत असतो; पण मिळणारी मजुरी ही इतर कामाच्या मजुरीच्या तुलनेत अल्प होती.

परंतु आता कामगार विभागाच्या वतीने १६ मार्चपासून माध्यान्ह भोजन सुरू करण्यात आले आहे. यात तालुक्यातील सहा ग्रामपंचायतींमधील तीन हजार आठशे मजुरांना याचा लाभ मिळत आहे.

जव्हार तालुक्यात रोजगार हमी योजनेंतर्गत कामे करीत असताना ऑनलाईन हजेरी, पगार मिळताना होत असणाऱ्या अडचणी यामुळे मजूर मेटाकुटीला आला होता;

परंतु जव्हार तहसीलदार आशा तामखडे यांच्या मार्गदर्शनाखाली रोजगार हमी योजना ही अधिक सक्षम करण्यावर भर दिला जात आहे.

तसेच मजुरांच्या दृष्टीने स्थानिक पातळीवर काम व्हावे आणि कामगार विभागाची मध्यान्ह भोजन योजना सुरू व्हावी याकरिता आमसभा होण्यापूर्वी कामगार विभागाला प्रशासानाकडून कळवण्यात आले होते.

शिवाय प्रायोगिक तत्त्वावर एका ग्रामपंचायत मध्ये मध्यान्ह भोजन योजना सुरूदेखील केली होती. तसेच उपस्थित मजुरांना भोजनाची व्यवस्था व्हावी, याकरिता शर्थीचे प्रयत्न केले व अखेर त्या प्रयत्नांना यश प्राप्त होऊन तालुक्यात रोजगार हमी योजनेकरिता माध्यान्ह भोजन योजना सुरू झाली.