ॲग्रोवन वृत्तसेवा
Ratnagiri News : राजापूर, जि. रत्नागिरी : समुद्रात झालेली वादळे, हवामानात झालेला बदल यामुळे आधीच मच्छीमारी व्यवसाय अडचणीत आलेला असताना आता समुद्रात सुटलेल्या मतलई वाऱ्यांमुळे मासेमारी ठप्प झाली आहे.

त्यातून मच्छीमार व्यावसायिकांना मोठ्या आर्थिक नुकसानीला सामोरे जावे लागत आहे. लहरी हवामानामुळे मत्स्य दुष्काळाचे मोठे संकट मासेमारी उद्योगासमोर उभे ठाकले असून, मासेमारी करणारे व्यावसायिक चिंतेत सापडले आहेत.

पावसाळी हंगामात बंद असणारा मासेमारी व्यवसाय १ ऑगस्टपासून सुरू होतो आणि सर्वसाधारणपणे मे महिन्यापर्यंत समुद्रातील मासेमारी सुरू असते. या वर्षी ऑगस्टपासून सुरू झालेल्या सागरी मासेमारी हंगामाला अद्याप सूर सापडलेला नाही. मच्छीमारी हंगाम सुरू झाल्यापासून समुद्रात झालेल्या वादळांचा परिणाम मच्छीमारी व्यवसायावर झाला आहे.

बदलत्या हवामानामुळे मासे मिळण्याचे प्रमाण घटत चालले आहे. परिणामी, हजारो रुपयांचे इंधन खर्च करून बोट समुद्रात नेल्यावर मासळी हाताशी लागत नसल्याने मच्छीमारांच्या पदरी निराशा पडू लागली आहे.

अशातच आता मतलई वाऱ्यांचे संकट मच्छीमारांसमोर उभे ठाकले आहे. समुद्रात सुटलेल्या मतलई वाऱ्यांचा परिणाम हा मासेमारी करणाऱ्यांच्या उद्योगावर होत असतो. मतलई वाऱ्यांमध्ये मच्छीमारी नौका समुद्रात नेणे धोकादायक असते. या वाऱ्यांमुळे मासे पकडण्यासाठी जाळी टाकण्यात अनेक अडथळे येतात.

जरी जाळी टाकली तरी गुरफटली जाते. समुद्रात मासेमारी करायला जाऊन हाती काहीच लागत नाही. त्यामुळे फायदा तर दूरच, उलट मच्छीमारांचे मोठं नुकसान होतं. त्यामुळे मतलई वारे सुटलेले असताना मच्छीमारी नौका किनाऱ्यावर ठेवणे व्यावसायिकांना भाग पडते.

निसर्गाची अवकृपा
या वर्षी आतापर्यंत सातत्याने निसर्गाच्या अवकृपेमुळे मासेमारी ठप्प झाली. त्यामुळे या वर्षी मत्स्योत्पादनातही घट होणार असून, मत्स्य दुष्काळाचे मोठे संकट मासेमारी करणाऱ्यांसमोर आहे. कमी प्रमाणात मिळणाऱ्या माशांमुळे त्यांच्या किमतीतही वाढ होणार असल्याने खवय्यांच्या ताटातूनही मासळी गायब होण्याची शक्यता आहे.