Palghar News : मोदी सरकारच्या महत्वाकांक्षी सागरमाला योजनेंतर्गत डहाणू तालुक्यातील वाढवण बंदर प्रस्तावित आहे. त्यासाठी सरकारने ५१ हजार कोटी रुपयांच्या तरतुदीलाही मान्यता दिली. परंतु या प्रकल्पाविरोधात स्थानिक मच्छिमार, शेतकरी आणि विविध संघटना रस्त्यावर उतरल्या आहेत.

या प्रकल्पाच्या निषेधार्थ रविवारी वाढवणमध्ये एल्गार सभेचे आयोजन करण्यात आले होते. या आंदोलनात शेकडो महिला आणि तरुण सहभागी झाले होते. यावेळी ते “एकच जिद्द वाढवण बंदर रद्द” ही घोषणा ते देत होते.

वाढवण बंदर विरोधी कृती समितीच्या वतीने आयोजित करण्यात आलेल्या सभेला पालघर जिल्ह्यातील नायगावपासून गुजरातच्या थेट उंबरगावपर्यंत आणि समुद्रकिनारी गावांसह जव्हार-मोखाडा या डोंगराळ भागातील हजारो स्थानिक भूमिपूत्र उपस्थित होते. आभालवृद्ध, तरुण-तरुणी, मुले, मोठ्या संख्येने सामील होऊन, मच्छीमार, शेतकरी, बागायतदार, डायमेकर व्यावसायिक, यांना उदध्वस्त करणारे,वाढवण बंदर कायमचे हद्दपार करण्याची मागणी करीत आहेत.