Nagar News : कापसाला दर (Cotton rate) नाही, पावसाने नुकसान झालेल्या शेतकऱ्यांना अजूनही नुकसानभरपाई मिळाली नाही. बँकेचे नियमित कर्ज फेड करणाऱ्या शेतकऱ्यांना पन्नास हजार रुपये अनुदान मिळत नाही.

त्यामुळे शेतकऱ्यांची दयनीय अवस्था होत असून, शासनाने या मागण्यांची दखल घेऊन त्या सोडवाव्यात, अशी मागणी करत अमरापूर (ता. शेवगाव) येथे शुक्रवारी (ता. २४) शेतकऱ्यांनी रास्ता रोको आंदोलन (Rasta Roka Andolan) केले.

कापसाला बाजारात (Cotton Market) सध्या प्रति क्विंटल साडेसात हजार रुपयांचा दर मिळत आहे. हा दर म्हणजे उत्पादन खर्च निघत नसल्याने कापूस उत्पादक संकटात आहे.

केंद्र सरकारने ऑस्ट्रेलियाकडून पन्नास लाख कापसाच्या गाठी आयात करून त्यावरील आयात शुल्क अकरा टक्के माफ करून व्यापाऱ्यांचा फायदा केला आहे.

या निर्णयामुळे कापूस उत्पादक शेतकऱ्यांचे मात्र मोठे नुकसान झाले आहे. त्यामुळे कापसाचे दर वाढावेत. कांद्याला आठ ते दहा रुपयांपेक्षा अधिक दर नाही.

यंदा खरिपात अतिवृष्टीमुळे पिकांचे मोठे नुकसान होऊन देखील अद्याप शेतकऱ्यांना नुकसान भरपाईचे पैसे मिळाले नाहीत. बँकेचे नियमित कर्ज फेड करणाऱ्या शेतकऱ्यांना पन्नास हजार रुपये अनुदानाची घोषणा केली.

मात्र अजूनही अनेक शेतकऱ्यांना हे पैसे मिळाले नाहीत. पीकविम्याचे पैसेही अद्याप अनेक शेतकऱ्यांना मिळालेले नाहीत. यामुळे शेतकऱ्यांचे आर्थिक नियोजन कोलमडले आहे.

त्यामुळे शासनाने या मागण्या पूर्ण करून शेतकऱ्यांना न्याय द्यावा, अशी मागणी करत अमरापूर (ता. शेवगाव) येथे शेतकरी विकास मंडळाचे शिवराज कापरे, बाळासाहेब पोटफोडे, बाळासाहेब मरकड, दिलीप पोटफोडे, गणेश बोरुडे आदींसह शेतकऱ्यांनी रास्ता रोको आंदोलन केले. दखल घेतली नाही तर तीव्र आंदोलन करण्याचा इशारा शेतकऱ्यांनी दिला.