Nashik News : जिल्हा सहकारी बँकेच्या जाचक १०० दिवसांच्या वसुलीविरोधात तसेच जप्ती, लिलाव, १००/८५ अंतर्गत ७/१२ वर नावे लावण्याविरोधात कायदेशीर लढा उभारणार असल्याची घोषणा नाशिक जिल्हा शेतकरी संघटनेतर्फे कसबे सुकेणे (ता. निफाड) येथे शरद जोशी प्रणीत जिल्हा शेतकरी संघटनेच्या शेतकरी मेळाव्यात सोमवारी (ता. १७) करण्यात आली.

शेतकरी संघटनेच्या पदाधिकाऱ्यांनी जिल्ह्यातील सर्व शेतकरी संघटना आणि शेतकरी नेत्यांनी मार्गदर्शन केले. अध्यक्षस्थानी शेतकरी संघटनेचे जिल्हाध्यक्ष अर्जुन बोराडे होते. या वेळी शेतकरी नेते प्रकाश शिंदे यांनी उच्च न्यायालयातील याचिकेसंदर्भात माहिती दिली.

जिल्हा बँकेच्या प्रत्येक नोटिशीला कायद्यानेच कशाप्रकारे आव्हान द्यावे यासंबंधी मार्गदर्शन केले. तसेच येत्या १५ दिवसांत वरील मागणीसाठी नाशिक येथे सहकुटुंब जनआंदोलन करणार असून सर्व शेतकऱ्यांनी जमीन वाचवण्यासाठी सहकुटुंब सहपरिवार उपस्थित राहावे, असे आवाहन करण्यात आले.

या वेळी स्वाभिमानी शेतकरी संघटना जिल्हाध्यक्ष निवृत्ती गारे, शेतकरी नेते रामदास ढिकले, भानुदास ढिकले, प्रहार जनशक्ती जिल्हाध्यक्ष दत्तू बोडके, युवा आघाडी जिल्हाध्यक्ष जगन काकडे, स्वराज्य पक्षाचे निफाड तालुकाध्यक्ष अशोक आहेर, उपसरपंच सचिन मोगल, संजय कावळे, सुरेश शिरसाट, जयराम मोरे, रघुनाथ जगताप यांनी केले.

मेळाव्यासाठी दत्तात्रय शेळके, मनू पाटील, अशोक सोमवंशी, सोमनाथ मोकाट, नामदेव भगत, भाऊसाहेब भंडारे, अशोक भंडारी, दत्तात्रय कडलक, बाळासाहेब बोरस्ते, जगनराव भुसाळ, रमेश बोरस्ते, रमेश जाधव आदींसह शेतकरी संघटनेचे पदाधिकारी व कार्यकर्ते उपस्थित होते.

ओटीएस सवलत द्या; जाचक वसुली थांबवा

सर्व शेतकऱ्यांनी आणि शेतकरी संघटनांनी कर्जमुक्ती नाहीतर राष्ट्रीय बँकेप्रमाणे एनपीए लागू करून व्याज आकारणी करावी व राष्ट्रीय बँकेप्रमाणे ओटीएस सवलत द्यावी तसेच जाचक वसुली त्वरित थांबवावी,अशी सूचना बैठकीत केली.