Onion Market News Nagar : कांद्याच्या प्रमुख बाजार समित्यांमधील विक्रीदर ४५० ते ६०० रुपयांपर्यंत कोसळल्याने महाराष्ट्रभरातील कांदा उत्पादक शेतकरी (Onion Producer Farmer) हवालदिल झाले आहेत.

सरकारी यंत्रणांनी मान्य केलेला कांद्याचा उत्पादन खर्च (Onion Production Cost) ८५० ते ९०० रुपये प्रति क्विंटल आहे. मात्र राज्यात आजमितीला कांद्याला (Onion Rate) प्रतिक्विंटल केवळ ४५० रुपये ते ६०० रुपये भाव मिळत आहे.

त्यामुळे निर्यातीला प्रोत्साहन द्यावे, अन्यथा प्रशासनाच्या दारात कांदे ओतून आंदोलन करणार आहोत, असा निर्णय किसान सभेने घेतला आहे.

कांदा उत्पादक शेतकरी व किसान सभेचे पदाधिकारी यांची अकोले येथे नुकतीच बैठक झाली. अनेक विषयांवर तीत चर्चा झाली. त्या वेळी हा निर्णय घेण्यात आला.

कांद्याचा उत्पादन खर्च तर सोडाच, या दरात काढणी आणि वाहतुकीचा दरही भरून निघत नाही. राज्यातील भाजप-शिंदे सरकारने या पार्श्‍वभूमीवर तातडीने हस्तक्षेप करण्याची आवश्यकता आहे.

दुर्दैवाने सरकार व राज्यातील सत्ताधारी पक्ष सत्तेच्या साठमारीत मश्गूल आहेत. मात्र, कांदा उत्पादकांसाठी आक्रमक आंदोलन उभे करण्याचा संकल्प किसान सभेने केला आहे.

डॉ. अशोक ढवळे, जे. पी. गावित, डॉ. अजित नवले, उमेश देशमुख, संजय ठाकूर, चंद्रकांत गोरखाना, सुभाष चौधरी आदी उपस्थित होते.