Nashik News : मॉन्सूनपूर्व पावसाने जिल्ह्यात जोरदार हजेरी लावत दाणादाण उडवली. अनेक ठिकाणी बागायती क्षेत्रावर भाजीपाला व फळपिकांचे नुकसान आहे. असे असताना अद्याप मॉन्सून दाखल झालेला नाही. मात्र मॉन्सूनपूर्व पावसाच्या ओलीवर मृग नक्षत्र लागताच शेतकऱ्यांनी पेरण्यांची लगबग सुरू केली आहे.
जिल्ह्यात खरीप पेरण्यांच्या यंदाचे सरासरी क्षेत्र ६ लाख ४० हजार ५५० हेक्टर इतके आहे. त्यानुसार कृषी विभागाने बियाणे नियोजन केलेले आहे. सध्या पेरण्या सुरू झाल्या असून शुक्रवारअखेर (ता. १३) जिल्हा अधीक्षक कृषी कार्यालयाकडे प्राप्त पेरणीच्या अहवालानुसार जिल्ह्यात ४ हजार ५४३ हेक्टरवर पेरण्या झाल्या आहेत. एकूण क्षेत्राच्या तुलनेत ३.३६ टक्के पेरण्या झाल्या आहेत.
अन्नधान्य पिकांमध्ये येवला, चांदवड व नांदगाव तालुक्यात बाजरी पेरणी जवळपास १०० हेक्टरवर झाली आहे. तर नांदगाव तालुक्यात सर्वाधिक ३ हजार ४८५ हेक्टरवर मका लागवड झाली आहे. यासह कळवण, देवळा, नांदगाव, सिन्नर, येवला व चांदवड तालुक्यात पेरण्या सुरू झाल्या आहेत.
कडधान्य पिकांमध्ये येवला व चांदवड तालुक्यात किरकोळ मूग व उडीद पेरणी सुरू झाली आहे. तर गळीतधान्य पिकात भुईमूग लागवड याच भागात सुरू आहे. तर सोयाबीन पेरा कळवण, येवला व चांदवडमध्ये काही शेतकऱ्यांनी केला आहे. तर मालेगाव व नांदगाव तालुक्यांत कापूस लागवडी सुरू झाल्या आहेत. मालेगाव तालुक्यात सर्वाधिक २ हजार ४६० हेक्टरवर कापूस लागवडी आहेत. एकंदरीत जिल्ह्यात मालेगाव तालुक्यात सर्वाधिक कापूस पीक लागवडी झाल्या असल्याचे चित्र दिसत आहे.
पेरण्यांची घाई नको
सध्या पावसाचा जोर कमी असल्याने शेतकऱ्यांची घाई दिसून येत नाही. तर पश्चिम भागातील भात पट्ट्यात अद्याप भात रोपे निर्मितीला गती नाही. १४ जूनपर्यंत तापमानात वाढ आणि काही ठिकाणीच मेघगर्जनेसह पाऊस होऊ शकतो.
या दरम्यान कमाल तापमान अधिक राहणार असल्यामुळे आणि सार्वत्रिक मॉन्सूनचा पाऊस अपेक्षित नसल्यामुळे शेतकऱ्यांनी प्रामुख्याने कोरडवाहू पेरणी आणि लागवडीची घाई करू नये, असे आवाहन कृषी विभागाकडून करण्यात येत आहे. जिल्ह्यातील जूनचे सरासरी पर्जन्यमान १७४.४० मिमी आहे. मागील वर्षी जून–२०२४ मध्ये प्रत्यक्ष पाऊस १४४.२० मिमी झाला होता. १८ दिवस पाऊस होता. तर ही टक्केवारी ८२.६८ टक्के होती. यंदा जूनमध्ये शुक्रवारअखेर (ता. १३) ४३.६ मिमी पाऊस झाला. ती २५ टक्के आहे. त्यामुळे पाऊस पडल्यानंतर टप्प्याटप्प्याने पेरण्या होतील, असे चित्र आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.