Pune News : खरीप हंगामात पीकस्पर्धा योजना राबविण्यात येत आहे. यासाठी जिल्ह्यातील इंदापूर तालुक्यातील शेतकऱ्यांनी अर्ज करावेत, असे आवाहन तालुका कृषी अधिकारी भाऊसाहेब रूपनवर यांनी केले आहे.

राज्यामध्ये पिकाची उत्पादकता वाढविण्यासाठी विविध भागांमध्ये शेतकऱ्यांकडून विविध प्रयोग करण्यात येतात. उत्पादकतेत वाढ करण्यात येते. अशा प्रयोगशील शेतकऱ्यांना मिळालेल्या उत्पादकतेबाबत प्रोत्साहन देऊन गौरव केल्यास त्यांची इच्छाशक्ती, मनोबल यामध्ये वाढ होऊन आणखी उमेदीने नवनवीन अद्ययावत तंत्रज्ञानाचा वापर केला जाईल.

यामुळे कृषी उत्पादनामध्ये भर घालण्यासाठी शेतकऱ्यांचे योगदान मिळेल. तसेच त्यांचे मार्गदर्शन परिसरातील इतर शेतकऱ्यांना होऊन इंदापूर तालुक्यामध्ये एकूण उत्पादनात मोलाची भर पडेल, हा उद्देश आहे.

या संदर्भात माहिती देताना श्री. रूपनवर म्हणाले, की कृषी विभागामार्फत खरीप हंगाम २०२४ मध्ये सर्वसाधारण व आदिवासी गटासाठी इंदापूर तालुक्यामध्ये खरीप हंगामामध्ये पीकस्पर्धा राबविण्यात येत आहे. यासाठी पात्रता निकषामध्ये, स्पर्धेत भाग घेण्यासाठी शेतकऱ्याकडे स्वतःच्या नावे जमीन असणे व ती जमीन तो स्वतः कसत असणे आवश्यक आहे.

स्पर्धेत भाग घेणाऱ्या शेतकऱ्याला एकाचवेळी एकापेक्षा जास्त पिकासाठी स्पर्धेत भाग घेता येईल. पीकस्पर्धेमध्ये सहभागी लाभार्थीच्या स्वतःच्या शेतावर त्या पिकाखाली किमान ४० आर क्षेत्रावर सलग लागवड असणे आवश्यक आहे. तसेच अर्ज करण्यासाठी आवश्यक कागदपत्रे विहित नमुन्यातील अर्ज (प्रपत्र-अ), ७/१२, ८-अ चा उतारा, जात प्रमाणपत्र (केवळ आदिवासी असल्यास बँक खाते चेक पासबुकच्या पहिल्या पानाची छायांकित प्रत आवश्यक आहे.