Dharashiv News : शेतकऱ्यांचे सोयाबीन बाजारात येण्यास सुरुवात होताच, दर कोसळले आहेत. त्यामुळे ‘आमची शेती सरकारला लिहून देण्याची वेळ आली आहे’, अशी संतप्त प्रतिक्रिया शेतकरी वर्गातून व्यक्त होत आहे.

शासनाच्या चुकीच्या धोरणामुळे दर कोसळले असल्याची भावना शेतकरी बोलून दाखवीत आहेत. एकीकडे अपुऱ्या पावसाने उत्पादनात घट अन् त्यात पुन्हा दर कोसळत असल्याने शेतकरी मेटाकुटीला आला आहे.

जिल्ह्यात यंदा सोयाबीनचा हंगाम बिघडला आहे. पावसाने काही प्रमाणात ओढ दिली होती. त्यामुळे उत्पादनात मोठी घट येण्याचे संकेत आहेत. सध्या जिल्ह्यातील सोयाबीन हंगाम काढणीच्या अवस्थेत आहे.

दर कोसळले

गेल्या महिन्याभरात सोयाबीनचे दर प्रतिक्विंटल पाच हजाराच्या पुढे होते. तर सध्या चार हजार ७०० रुपयांच्याही खाली आले आहेत. विशेष म्हणजे पाच हजार २०० रुपयांवर असलेले सोयाबीन चार हजार ७०० रुपयांवर येऊन ठेपले आहे.

त्यामुळे शेतकऱ्यांना उत्पादन खर्चही निघणे अवघड होऊन बसले आहे. सध्या शेतकऱ्यांचे सोयाबीन बाजारात येत आहे. त्याच वेळेला दर कोसळल्याने शेतकरी वर्गातून तीव्र नाराजी व्यक्त होत आहे.