सकाळ वृत्तसेवा

Nandurbar News : नंदुरबार : शेतकरी, विविध शासकीय योजना, रोजगारासह विविध मागण्यांसंदर्भात महाराष्ट्र राज्य शेतमजूर युनियन (लालबावटा)तर्फे तहसील कार्यालयावर मोर्चा काढण्यात आला.

येथील कोरीट नाका परिसरातून गिरीविहारमार्गे तहसील कार्यालय येथे राज्य शेतमजूर युनियन लालबावटामार्फत विविध मागण्यांसंदर्भात मोर्चा काढण्यात आला. या वेळी तहसीलदारांना निवेदन देण्यात आले. निवेदनावर राज्य उपाध्यक्ष नथू साळवे, सुनील गायकवाड, सोनू न्हावे, अनिल शिरसाट, अनिल ठाकरे, रुबाबसिंग ठाकरे, सुदाम ठाकरे यांच्या सह्या आहेत.

निवेदनातील मागण्या अशा ः नंदुरबार तालुक्यात शेतीचे कामे संपलेली आहेत. मजुरांना रोजगार द्यावा, भूमिहीन -शेतमजूर, बेघर लोकांना शासनाच्या पंतप्रधान आवास योजना, रमाई आवास योजना व शबरी आवास योजनेमार्फत घरकुल मंजूर होत आहेत व होणार आहेत.

शासनाच्या नियमानुसार एक लाख २० हजार रुपये मंजूर होतात; परंतु महागाईच्या निर्देशाप्रमाणे वाळू, विटा, सिमेंटचे दर वाढलेले असल्याने घरकुल पूर्ण बांधले जात नाही म्हणून घरकुलांची रक्कम केरळ राज्याप्रमाणे प्रत्येकी सात लाख रुपये मंजूर करावे, घरासाठी जागा उपलब्ध करून द्यावी, भूमिहीन शेतमजूर, वृद्ध, अपंग, विधवा, परितक्त्या यांना वार्षिक २१ हजारांचा उत्पन्नाचा दाखला सोबत जोडावा लागतो; परंतु तलाठी हे २१ हजारांच्या उत्पन्नाच्या दाखल्यावर शिफारस न देता ४० ते ५० हजारांचे उत्पन्नाचे दाखल देत आहेत म्हणून लाभार्थींना योजनेचा लाभ होत नाही व योजनेपासून वंचित राहत आहेत.

शासनाने लाडक्या बहिणींना अडीच लाखाचे वार्षिक उत्पन्नाची सवलत दिली आहे. तशीच सवलत संजय गांधी निराधार योजनेच्या लाभार्थींना अडीच लाख उत्पन्नाचे दाखले देण्यात यावे. तालुक्यात मनरेगामार्फत नाला बडिंग, शेततळे रस्ते, लोकांना रोजगार द्यावा या प्रमुख मागण्यांसह इतर अनेक मागण्यांचा समावेश आहे.