Pune News : पुणे बाजार समितीमध्ये संचालक मंडळ नियुक्त झाल्यापासून अनेक गैरप्रकार सुरू आहेत. यामध्ये बनावट पावती पुस्तकाद्वारे एकाच नंबरच्या पावतीद्वारे बाजार शुल्क वसुलीचा प्रकार उघड झाल्यानंतर आता बाजार समितीच्या नावे बनावट पावती पुस्तक तयार करून बेकायदा पार्किग शुल्क वसूल केले जात असल्याचा गैरप्रकार समोर आला आहे. यामध्ये प्रामुख्याने गुंडप्रवृत्तीच्या लोकांकडून परराज्यांतील शेतमाल वाहतुक करणाऱ्या वाहनचालकांना टार्गेट केले जात असल्याचे समोर आले आहे.

बाजार समितीच्या प्रवेशद्वार क्रमांक चार परिसरातून परराज्यातील वाहने बाजार समितीमध्ये प्रवेश करत असताना, मोठी वाहतूक कोंडी होते. या वाहतूक कोंडीत अनेक ट्रक अडकलेल असतात. याचाच फायदा घेत काही गुंडप्रवृत्तीचे लोक ‘एपीएमसी पुणे’ अशा ठळक अक्षरातील १२० रुपयांची छापील पावती पार्किंग शुल्क म्हणून आकारले जात असल्याचे प्रकार रासरोस पणे घडत आहे.

तर बाजार समितीचे अधिकृत प्रवेश शुल्क १० रुपये असताना, त्याचे ३० रुपये आकारले जात असल्याचे वाहन चालकांनी सांगितले, मात्र याबाबत बाजार समिती प्रशासानाचे जाणीवपूर्वक दुर्लक्ष होत असल्याची चर्चा बाजार आवारात आहे.

बाजार आवारात फळे भाजीपाला, कांदा, बटाटा, भुसार, केळी विभागात दररोज किमान एक हजार वाहनांमधून शेतमालाची आवक होत आहे. या वाहनचालकांकडून गैरमार्गाने धाकधटपशा करून अतिरिक्त पैसे वसूल केले जात असल्याचे ट्रक चालकांनी सांगितले.

बनावट पावतीद्वारे सेस वसुली चौकशी अहवाल गुलदस्तात

काही दिवसांपूर्वी एकाच क्रमांकाच्या दोन पावत्यांद्वारे सेस भरणा केल्याचे समोर आले होते. याबाबत पोलिस ठाण्यात लेखी तक्रारदेखील करण्यात आली होती. मात्र याबाबतचा चौकशी अहवाल गुलदस्त्यात आहे. यामध्ये काही संचालकांचा समावेश असल्याची चर्चा बाजार आवारात आहे.