Solapur News : लोकसभा निवडणुकीतील रणधुमाळीचा निकाल समोर येण्यापूर्वीच जिल्ह्यातील सोलापूर व बार्शी कृषी उत्पन्न बाजार समितीच्या संचालक मंडळाच्या निवडणुकीसाठी हालचाली सुरू झाल्या आहेत.

या दोन्ही बाजार समित्यांच्या संचालक मंडळाची निवडणूक घेण्यासाठी मतदानाची अर्हता तारीख काय असावी? अशी विचारणा जिल्हा उपनिबंधक कार्यालयाने राज्य सहकारी निवडणूक प्राधिकरणाकडे केली आहे. प्राधिकरणाकडून अर्हता तारीख आल्यानंतर या दोन्ही बाजार समित्यांच्या निवडणूक प्रक्रियेला सुरवात होण्याची शक्यता आहे.

सोलापूर बाजार समितीवर माजीमंत्री तथा आमदार विजयकुमार देशमुख यांचे वर्चस्व आहे. बार्शी बाजार समितीवर बार्शीचे आमदार राजेंद्र राऊत यांचे वर्चस्व आहे. या दोन्ही बाजार समित्यांमधील संचालक मंडळाची मुदत साधारणतः एक वर्षापूर्वीच संपली आहे. महाराष्ट्र पणन कायद्यात असलेल्या तरतुदीनुसार या दोन्ही बाजार समित्यांना सहा-सहा महिन्यांची दोन वेळा मुदतवाढ मिळाली आहे.

पणन कायद्यातील तरतुदीनुसार बाजार समित्यांच्या संचालक मंडळाला फक्त एक वर्षाचीच मुदतवाढ देता येते. एक वर्षाची मुदतवाढ संपल्यानंतर प्रशासक किंवा निवडणूक हे दोनच पर्याय शिल्लक राहतात.

सोलापूर बाजार समितीच्या संचालक मंडळाला दुसऱ्यांदा मिळालेली मुदतवाढ १४ जुलै २०२४ रोजी तर बार्शी बाजार समितीच्या संचालक मंडळाला दुसऱ्यांदा मिळालेली मुदतवाढ २३ जुलै २०२४ रोजी पूर्ण होत आहे.

सध्याच्या संचालक मंडळाकडे साधारणतः महिना ते दीड महिन्यांचा कालावधी शिल्लक आहे. या कालावधीत प्राधिकरणाकडून अर्हता तारीख प्राप्त झाल्यास मतदार यादी तयार करण्याचा कार्यक्रम सुरू होऊ शकतो.

निवडणुकांसाठी वाट बिकट

पावसाळ्यात निवडणुका घेऊ नयेत, याबाबत प्राधिकरण व सहकार विभागाने यापूर्वीच सूचना दिलेल्या आहेत. जूनपासून पावसाळा सुरू होत आहे. ऑक्टोबरपर्यंत पावसाळा असल्याने दरम्यानच्या काळात मतदार याद्या जरी अंतिम झाल्या तरीही प्रत्यक्ष निवडणुकीची वाट बिकटच आहे.

नोव्हेंबरपासून या निवडणुकांना सुरुवात होऊ शकते. दरम्यानच्या काळात विधानसभा निवडणुकांचा निकाल, नवीन सरकारची स्थापना, मुख्यमंत्री व मंत्रिमंडळ विस्तार या घटना-घडामोडी घडण्याची शक्यता असल्याने त्या धामधुमीत बाजार समित्यांच्या निवडणुकांना किती महत्त्व दिले जाईल? यावर बाजार समित्यांच्या निवडणुकीची वाट अवलंबून असणार आहे.