Maharashtra Politics : राज्याचे काळजीवाहू मुख्यमंत्री एकनाथ शिंदे हे सध्या सातारा येथील दरे या आपल्या गावी गेले आहेत. सत्तास्थापनेच्या गडबडीतच अचानक त्यांनी गावाकडचा रस्ता धरल्याने अनेक चर्चांना उधाण आलं आहे. दरम्यान गावी गेल्यानंतर अचानक शिंदेंची तब्बेत बिघडल्याची माहिती समोर आली आहे. यामुळे कोणालाही भेटणार नसल्याचे सांगण्यात आले आहे.

काळजीवाहू मुख्यमंत्री शिंदे यांची शुक्रवारीच (ता.२९) तब्बेत काहीशी ठीक नसल्यानं मुंबईतून गावाला जाण्याचा निर्णय घेतल्याचे सांगितले जात आहे. दरम्यान, भाजपकडून मुख्यमंत्रीपदाचा चेहरा अद्याप जाहीर केला जात नसल्यानं एकनाथ शिंदे नाराज असल्याचं कळतं आहे. मुख्यमंत्रीपदाचा चेहरा जाहीर झाल्याशिवाय पुढची चर्चा होणार नाही, असा पवित्रा शिंदे आणि अजित पवारांनी घेतल्याचे बोलले जात आहे.

शिंदेच सर्व निर्णय घेतील

उपमुख्यमंत्री व्हायचं की नाही हे शिंदेच ठरवतील. त्यांनी सरकारमध्ये रहावं अशी आमची इच्छा आहे. मी खरं सांगतो, तुम्हाला कदाचित पटणार नाही. पण एकनाथ शिंदे यांना ताप होता. सर्दी होती. त्यांची प्रकृती चांगली नाही. पण ते नाराज नाहीत, पण अस्वस्थ आहेत. चांगल्या हवामानासाठी ते गावी गेले आहेत, असे उदय सामंत म्हणाले.

५ डिसेंबरला शपथविधी

महायुतीच्या नव्या मुख्यमंत्र्याचा शपथविधी ५ डिसेंबरला होण्याची शक्यता आहे. शपथविधी सोहळ्यासाठी आझाद मैदानाची चाचपणी केली जात आहे. दादर येथील शिवाजीपार्कवर २ डिसेंबर रोजी नव्या मुख्यमंत्र्यांचा शपथविधी होणार असे बोलले जात होते. मात्र ६ डिसेंबर रोजी महापरिनिर्वाण दिनाचा कार्यक्रम असल्यामुळे शिवतीर्थ उपलब्ध होणार नाही. त्यामुळे ५ डिसेंबरला आझाद मैदानावर हा शपथविधी होण्याची शक्यता आहे.

गृह खात्यावरून तिढा?

मुख्यमंत्रिपदावरून सुरू असलेला गुंता सुटला असला तरी, मंत्रीमंडळातील जागा वाटपावरून तिढा वाढला आहे. भाजप आणि शिंदेंच्या शिवसेनेत गृहखातं कुणाकडे जाणार यावरून चढाओढ सुरू असल्याचे बोलले जात आहे. मागच्या मंत्रीमंडळात फडणवीसांकडे असलेलं गृहखातं आता शिंदेंना हवं आहे पण भाजप गृहखातं सोडण्यास तयार नसल्याची चर्चा रंगली आहे.