Nagar News : महसूल कर्मचाऱ्यांच्या प्रलंबित मागण्या तातडीने सोडाव्यात, या मागणीसाठी महाराष्ट्र राज्य महसूल कर्मचारी संघटनेने सुरू केलेले कामबंद आंदोलन शुक्रवारी (ता. १९) पाचव्या दिवशी सुरुच होते. महसूल कर्मचारी कामावर येत नसल्याने जिल्हाधिकारी कार्यालय, तहसील कार्यालयात शुकशुकाट आहे. त्यामुळे महसुली कामे ठप्प आहेत.

महसूल कर्मचाऱ्यांनी विविध मागण्यांसाठी सोमवार (ता. १५) पासून कामबंद आंदोलन सुरू केले आहे. त्यामुळे विविध महसूल विभागाशी निगडित कामे ठप्प आहेत. शासन मागण्यांचा गांभिर्याने विचार करत नाही, त्यावर तोडगा काढत नाही तोपर्यंत कामबंद आंदोलन सुरूच राहील,

असे महाराष्ट्र राज्य महसूल कर्मचारी संघटनेचे अध्यक्ष जीवन आहेर, सरचिटणीस किशोर हटकर, नगर जिल्हाध्यक्ष राजेंद्र आंधळे, माजी अध्यक्ष भाऊसाहेब डमाळे, उपाध्यक्ष अशोक मासाळ, संतोष झाडे, स्वप्निल फलटणे, अक्षय फलके यांनी सांगितले. या संदर्भात मंगळवारी (ता. २३) बैठक होईल.

काही प्रमुख मागण्या अशा...

महसूल विभागाचा सुधारित आकृतिबंध दांगट समितीच्या अहवालातील शिफारशीप्रमाणे कोणत्याही संवर्गातील कर्मचारी कपात न करता लागू करा.

अव्वल कारकून, मंडळ अधिकारी संवर्गातून नायब तहसीलदार संवर्गात तत्काळ पदोन्नती द्या. पुरवठा विभागातील पदभरतीमुळे रिक्त होणाऱ्या महसूल कर्मचाऱ्यांना महसूल विभागात सामावून घ्या.

वेतन देयके उणे प्राधिकारपत्रावर वाढविण्याबाबत निर्णय घ्या.

महसूल सहाय्यकांचा ग्रेड पे १९०० वरून २४०० करा.

महसूल सहाय्यक, तलाठी यांना सेवांतर्गत एकसमान परीक्षा पद्धती लागू करा.

अव्वल कारकून या संवर्गाचे पदनाम बदलून सहाय्यक महसूल अधिकारी करावे. नायब तहसीलदार संवर्गाचा ग्रेड वेतन ४८०० करावा.

चतुर्थ श्रेणी शिपाई कर्मचाऱ्यांना पदोन्नती देताना तलाठी संवर्गात २५ टक्के पदोन्नती द्यावी. कोतवाल पदांना चतुर्थ श्रेणी दर्जा द्यावा.