Jalna News : पाऊस पडला की लगेच पेरणीची घाई न करता पीक पद्धतीमध्ये बदल, वाणांची निवड, बीजप्रक्रिया, एकात्मिक अन्नद्रव्य, तण, पाणी, कीड आणि रोग व्यवस्थापन या पंचसूत्रीचा अवलंबून एकात्मिक पीक व्यवस्थापन करावे, असा सल्ला बदनापूर कृषी विज्ञान केंद्राच्या विषय विशेषज्ञ कृषिविद्या डॉ. दीपाली कांबळे यांनी दिला.

गेवराई बाजार (ता. बदनापूर) येथे कृषी संजीवनी सप्ताह कार्यक्रम जिल्हा अधीक्षक कृषी अधिकारी व तालुका कृषी अधिकारी यांच्या मार्गदर्शनाखाली आयोजित करण्यात आला होता. यामध्ये विषय विशेषज्ञ कृषिविद्या, डॉ. कांबळे यांनी आपत्कालीन पीक व्यवस्थापन याविषयी सविस्तर मार्गदर्शन केले.

मंडळ कृषी अधिकारी श्री. सरोदे यांनी महिलांचा शेती क्षेत्रामधील योगदानाबद्दल माहिती दिली. कृषी सहायक श्री. वांढेकर यांनी कॉटन स्मार्ट या योजनेबद्दल सविस्तर चर्चा केली. या वेळी प्रदीप पाटील, गावचे प्रथम नागरिक सरपंच रणजित चव्हाण तसेच समस्त गेवराई बाजार ग्रामस्थ यांचा सकारात्मक प्रतिसाद मिळाला.