Ratnagiri News : गेले १५ दिवस दुपारनंतर पडणाऱ्या पावसाने शेतकरी हैराण झाले होते. मात्र शनिवारपासून (ता. २६) पावसाने विश्रांती घेतल्यामुळे रत्नागिरी जिल्ह्यात भातकापणी व झोडणीच्या कामाला वेग आला आहे.

दिवाळी तोंडावर आली असली तरीही शेतकरी आता दिवाळीपेक्षा शेतातील धान्य घरात आणण्याच्या कामात मग्न झाले आहेत. परिसरात ६० टक्के कापणी पूर्ण झाली आहे.

सुरुवातीपासून सप्टेंबरपर्यंत पावसाने सातत्य ठेवल्याने यावर्षी चांगले पीक तयार झाले होते. मात्र ऑक्टोबरमध्ये सुरू झालेल्या पावसाने शेतकऱ्यांची चिंता वाढवली. अनेक ठिकाणी हळवी भातशेती पावसामुळे आडवी झाल्याने नुकसान झाले.

आडव्या पडलेल्या भाताला पुन्हा कोंब आल्याने शेतकऱ्याने डोक्याला हात लावला होता. पाऊस विश्रांती घेत नसल्याने कापणीही करता येत नव्हती. दुपारपर्यंत कडकडीत ऊन आणि नंतर पाऊस यामुळे शेतकरी हतबल झाला होता.

दिवाळी तोंडावर आली तरी धान्य घरात येत नव्हते. कापलेले भात सुकवणे यातच शेतकऱ्यांचा वेळ जात होता. आता महान पीकही कापणीस तयार झाले आहे. गेले दोन दिवस पावसाने पूर्ण विश्रांती घेतल्यामुळे शेतकरी पूर्ण दिवस शेतातच आहे.

सोमवारी (ता. २८) वसुबारसेपासून दिवाळी सुरू होते. मात्र दिवाळीपेक्षाही वर्षभराचे धान्य वेळेत घरी आणण्याची गडबड सुरू झाली आहे.

सकाळी भात कापल्यानंतर दुपारनंतर लगेच झोडले जात आहे. त्यासाठी शेतातच खळी तयार केली आहेत. हवामान खात्याने पावसाचा अंदाज वर्तवल्यामुळे शेतकरी आता दिवाळी साजऱ्या करण्याच्या मनस्थितीत दिसत नाहीत.