Pune News : गेल्या काही वर्षांपासून कृषी विभागात पदोन्नती देण्यात येत आहे. ही पदोन्नती सकाळी दिली जात असून संध्याकाळी तो अधिकारी सेवानिवृत्त होत असल्याने संचालकांमध्ये नाराजीचा सूर उमटत आहे.

२८ फेब्रुवारी रोजी शासनाने कृषी विभागातील किसन मुळे, अशोक किरनाळी, अंकुश माने या तीन अधिकाऱ्यांना पदोन्नती देण्यात आल्याचे आदेश उपसचिव प्रफुल्ल ठाकूर यांनी काढले होते. त्यातील किसन मुळे या संचालकांना पदोन्नतीच्या दिवशी सेवानिवृत्ती घेण्यात आली.

कृषी विभागातील श्री. किरनाळी आणि किसन मुळे यांची सहसंचालक पदावर तीन वर्षे पूर्ण होत नव्हते तरीही संचालकपदी संधी देण्याच्या उद्देशाने १४ ऑक्टोबर २०२४ रोजी शासन आदेशान्वये कृषी संचालक संवर्गातील श्रेणी अवनत केलेल्या आत्माच्या संचालक पदावर तात्पुरत्या स्वरूपात नियुक्ती करण्यात आली होती.

तर अशोक मुळे यांची महाराष्ट्र राज्य फलोत्पादन व औषधी वनस्पती मंडळ या पदावर नियुक्ती करण्यात आली होती. त्यानंतर श्री. किरनाळी आणि किसन मुळे यांना २८ फेब्रुवारी रोजी सदर पद श्रेणी उन्नत करून पदोन्नतीने पदस्थापना देण्यात आली. तर ठाणे विभागातील विभागीय कृषी सहसंचालक अंकुश माने यांची अकोला येथील महाराष्ट्र राज्य बीज प्रमाणीकरण यंत्रणा येथे रिक्त पदी नियुक्ती करण्यात आली आहे.

कृषी विभाग हा मागील काही वर्षांपासून पदोन्नती, बदल्या, रिक्त पदे आणि वारंवार पुढे येणारे गैरव्यवहार यामुळे सतत चर्चेत येत आहे. त्यातच कृषी विभागाविषयी अधिकाऱ्यामध्ये नाराजी व्यक्त केली जात आहे.

यापूर्वी डी. एल. जाधव, काशिनाथ तरकसे या अधिकाऱ्यांनाही सेवानिवृत्तीच्या दिवशी पदोन्नती देण्यात आली होती. तर माजी संचालक असलेल्या मच्छिंद्र घोलप यांना अखेरच्या चार ते पाच दिवस बाकी असताना पदोन्नती देण्यात आली होती. त्यामुळे शेवटच्या दिवशी पदोन्नती देण्यात येत असलेल्या अधिकाऱ्यामध्ये ही प्रथा पडत असल्याकारणाने अधिकाऱ्यामध्ये नाराजी व्यक्त करण्यात येत आहे.