Nashik onion News : जिल्ह्यात रविवारी (ता. ५) मध्यरात्रीनंतर वादळी वाऱ्यासह पाऊस झाला. त्यामुळे कांदा पिकासह (onion Crop) गहू (Wheat), हरभरा (Chana) या रब्बी पिकांचे तसेच द्राक्षबागा व फळबागांचे मोठ्या प्रमाणावर नुकसान झाले आहे.

त्याअनुषंगाने पावसामुळे शेतपिकांचे झालेल्या नुकसानीचे तातडीने पंचनामे करण्याची मागणी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांना पत्र देऊन केली असल्याचे केंद्रीय आरोग्य राज्यमंत्री डॉ. भारती पवार यांनी कळविले.

जिल्ह्यात अवकाळी पावसामुळे कापणीला आलेला गहू, हरबरा व इतर रब्बी पिके भूईसपाट होऊन भिजल्याने शेतकऱ्यांचे मोठे नुकसान झाले.

कृषी विभागाच्या आकडेवारीनुसार जिल्ह्यात दोन दिवसांत बाधित झालेली १९१ गावे व संभाव्य बाधित होणाऱ्‍या गावांमध्ये अंदाजे २६०० हेक्टरपेक्षा जास्त क्षेत्रावरील पिकांचे व फळबागांचे नुकसान झाल्याने शेतकरी कोंडीत सापडला.

वादळी वारे व अवकाळी पावसामुळे बाधित शेतींचे जिल्हाधिकाऱ्यांमार्फत तत्काळ पंचनामे करावेत. त्याचप्रमाणे कोणीही आपत्तीग्रस्त शासकीय मदतीपासून वंचित राहू नये, याकरिता नुकसानग्रस्तांना आर्थिक मदतीसाठी मुख्यमंत्री व उपमुख्यमंत्र्यांना पत्र लिहून मागणी केली आहे, असेही त्यांनी सांगितले.