Ahilyanagar News : पारनेर साखर कारखाना विक्री गैरव्यवहारप्रकरणी दाखल गुन्ह्यातील आरोपींना तातडीने अटक करावी. तसेच गुन्ह्याची व्याप्ती मोठी असल्याने तपासासाठी विशेष तपास पथकाची (एसआयटी) स्थापना करावी, अशी मागणी जिल्हा पोलिस अधीक्षक व अप्पर पोलिस अधीक्षकांना दिलेल्या निवेदनात कारखाना बचाव व पुनरुज्जीवन समितीच्या वतीने करण्यात आली आहे, अशी माहिती समाजीक कार्यकर्ते व या प्रकरणातील फिर्यादी अॅड. रामदास घावटे यांनी दिली.

अॅड. रामदास घावटे यांनी सांगितले, की पारनेर साखर कारखाना विक्री गैरव्यवहारप्रकरणी पारनेर न्यायालयाच्या आदेशाने राज्य सहकारी बँकेचे दोन वरिष्ठ अधिकारी, माजी खासदार विदुरा नवले यांची मुले ज्ञानेश व शिवराज नवले यांच्यासह क्रांती शुगर लिमिटेड कंपनीच्या संचालकांवर ८ जानेवारी रोजी गुन्हा दाखल झाला आहे.

गुन्हा दाखल होऊन पाच दिवस झाले तरी तपासी अधिकारी, पारनेरचे पोलिस निरीक्षक समीर बारवकर यांनी अद्याप तपास सुरू केला नाही अथवा फिर्यादीकडे कागदपत्रांची मागणी केली नाही, असा आरोप बचाव पुनरुज्जीवन समितीच्या वतीने करण्यात आला.

पारनेर तालुक्याची कामधेनू असलेल्या सुमारे १७ हजार सभासदांच्या मालकीच्या सहकारी साखर कारखान्याचे भ्रष्ट मार्गाने खासगीकरण केलेल्या प्रकरणासंबंधित हा गुन्हा दाखल करण्यात आला आहे. कारखाना विक्री गैरव्यवहार हा तब्बल ३०० ते ४०० कोटींचा आहे.

याबाबतचा सर्व कागदोपत्री पुरावा कारखाना बचाव व पुनरुज्जीवन समितीकडे आहे. या आर्थिक व्यवहाराच्या गुन्ह्याच्या तपासासाठी एसआयटीची नेमणूक करावी, असे निवेदनात म्हटले आहे.

गुन्ह्यातील आरोपींना २६ जानेवारीपर्यंत अटक न झाल्यास २७ पासून पारनेर पोलिस ठाण्यासमोर कारखाना सभासदांसह उपोषण करण्याचा इशारा कारखाना बचाव व पुनरुज्जीवन समितीने दिला. फिर्यादी या नात्याने गुन्ह्याशी संबंधित माहिती तपास अधिकारी बारवकर यांना देण्याचा प्रयत्न केला असता ते दुर्लक्ष करतात. त्यामुळे आम्ही अटकेची मागणी केली, असे ॲड. घावटे म्हणाले.