Jalgaon News : खानदेशात मका, हरभरा पिकांत अळीचा प्रकोप वाढत आहे. मका पिकात अमेरिकन लष्करी अळी दिसत आहे. ही समस्या दूर करण्यासाठी योग्य मार्गदर्शन व कृषी निविष्ठा किंवा कीडनाशके उपलब्ध करून देण्याची मागणी शेतकरी करीत आहेत.

मध्यंतरी जळगाव लोकसभा क्षेत्राचे खासदार उन्मेष पाटील यांनीदेखील या समस्येबाबत जिल्हा प्रशासन, शासनाकडे मागणी केली होती. सतत ढगाळ वातावरण असते. दुसरीकडे विषम वातावरणामुळे पिकांवर किडींचा प्रकोप होत आहे. हरभरा पिकात घाटे अळी आहे. तर मका पिकात अमेरिकन लष्करी अळी आहे.

खानदेशात सुमारे ४५ हजार हेक्टरवर मका पीक आहे. तर सुमारे दीड लाख हेक्टरवर हरभरा पीक आहे. एक महिना किंवा २० दिवसांच्या मका पिकातही लष्करी अळीचा प्रकोप आहे.

ही अळी पोंग्यात सक्रिय असून, यामुळे पिकाची वाढ खुंटली आहे. हरभऱ्यालाही घाटे लगडत आहेत. पण घाट्यांचे नुकसान अळ्या करीत आहेत. यामुळे शेतकरी संकटात आहेत. कीडनाशके खरेदी करून त्याची फवारणी घेत आहेत. फवारणी न केल्यास पीक पुरते हातचे जात आहे.

फवारणी न घेतल्यास मका पिकाचा तर चाराही हाती येणार नाही, अशी स्थिती आहे. मका पीक जोमात येण्यासाठी खतांबरोबरच कीडनाशके, संप्रेरके घ्यावी लागत आहेत. यात उत्पादन खर्च किमान २० टक्के वाढला आहे.

मका पिकाला फवारणीसंबंधी कीडनाशकांचा एकरी किमान तीन हजार रुपये खर्च येत आहे. खर्च अधिक, पण दर कमी, अशी स्थिती आहे. यामुळे कीडनाशके व आवश्यक निविष्ठा कृषी विभाग, शासनाने अनुदानावर उपलब्ध करून द्याव्यात, अशी मागणी शेतकरी करीत आहेत.