Amaravati News : महात्मा जोतिराव फुले शेतकरी कर्जमुक्ती योजनेंतर्गत प्रोत्साहनपर लाभासाठी पात्र ठरलेल्या शेतकऱ्यांनी आधार प्रमाणीकरण केलेले नाही. त्यामुळे ते लाभापासून वंचित राहण्याची शक्यता आहे.

या शेतकऱ्यांना आधार प्रमाणीकरणासाठी सात सप्टेंबरपर्यंत मुदत देण्यात आली आहे. या योजनेंतर्गत पात्र ठरलेल्या शेतकऱ्यांना म्हणजे विशिष्ट क्रमांक देण्यात आलेल्या शेतकऱ्यांनी आधार प्रमाणीकरण केलेले नाही.

महाआयटीने या शेतकऱ्यांना प्रमाणीकरणाची सुविधा १२ ऑगस्टपासून उपलब्ध करून दिली आहे. ही सुविधा सात सप्टेंबरपर्यंत राहणार असून या कालावधीत त्यांनी सेतू केंद्रावरून आधार प्रमाणीकरण करून घ्यावे, असे आवाहन जिल्हा उपनिबंधक शंकर कुंभार यांनी केले आहे.

जिल्ह्यामध्ये अद्याप ४५० पात्र शेतकऱ्यांनी आधार प्रमाणीकरण केलेले नाही. या पात्र शेतकऱ्यांनी त्यांचा विशिष्ट क्रमांक संबंधित बॅंक किंवा तालुक्यातील सहायक निबंधक कार्यालयातून अवगत करून सेतू केंद्राहून पोर्टलवर आधार प्रमाणीकरण करून घ्यावे, असे आवाहन करण्यात आले आहे.

तालुकानिहाय शेतकरी

अमरावती ः ४३ , चांदूरबाजार ७६, चांदूररेल्वे ः ३३, तिवसा ः ११, नांदगाव खंडेश्वर ः २५, मोर्शी ः ४९, धारणी ः २२, अचलपूर ः १५, धामणगावरेल्वे ः ३५, अंजनगावसुर्जी ः ३०, दर्यापूर ः ४१, वरुड ः ३५, भातकुली ः ३४, चिखलदरा ः १