Sangli Electricity Issue : महावितरणकडून शेतीसाठी दिवसा आठ तास, तर रात्रीच्या वेळी दहा तास वीजपुरवठा केला जात आहे. त्यातून दिवसा आणि रात्री होणारा वीजपुरवठाही खंडित होत आहे.

काही वेळेस भारनियमनही होत असल्याने पाणी असूनदेखील पिके वाळण्याच्या मार्गावर आहेत. त्यामुळे शेती पिकांना पाणी कसे द्यायचे, असा प्रश्न शेतकऱ्यांसमोर आहे.

महावितरणकडून कृषिपंपासाठी दिवसा आठ तास तर रात्रीच्या वेळी दहा तास वीजपुरवठा केला जातो. त्यामध्ये रात्रीच्या वेळी आठ वाजता कृषिपंपाची वीज येते, तर काही वेळेस नऊ किंवा दहा वाजता वीजपुरवठा केला जातो. त्यानुसार शेतकरी पिकांना पाणी देण्याचे नियोजन करतात.

जिल्ह्यातील सध्या वीज पुरवठ्याचे वेळापत्रक पाहिले असता पाण्याची पुरेशी उपलब्धता असूनही खंडित वीजपुरवठ्यामुळे बहुतांश भागांतील पिकांना पाणी देण्यासाठी अडचणी येत आहेत.

जिल्ह्यातील दुष्काळी आणि पाण्याने सधन भाग असे दोन भाग आहेत. सध्या दुष्काळी भागातील पाणी टंचाई दूर व्हावी, यासाठी ताकारी, टेंभू आणि म्हैसाळ योजना सुरू कररून शेतीला पाणी उपलब्ध करून दिले आहे.

मात्र, सध्या वाढत्या उन्हाळ्यामुळे भूजल पातळी घटू लागली आहे. त्यातूनहीं शेतकरी शेतीला पाणी देण्याचे काटेकोर नियोजन करत असल्याचे चित्र आहे.

पिकांना वारंवार पाणी द्यावे लागत आहे. त्यामुळे उन्हाळ्याच्या पार्श्‍वभूमीवर महावितरणने कृषिपंपांना दिवसा बारा तास वीजपुरवठा करावा, अशी मागही शेतकरी करू लागले आहेत.