Latest Agriculture News : अनियमित पाऊस आणि हवामान बदलामुळे चिकू पिकावर बुरशीजन्य रोगाचे सावट आले आहे. त्यामुळे डहाणू तालुक्यातील चिकू बागायतदारांचे नुकसान होत आहे.

सरकारने एकरी ४० हजार रुपयांची मदत करावी, अशी मागणी चिकू बागायतदारांकडून करण्यात येत आहे.

पालघर जिल्ह्याच्या डहाणू, घोलवड भागात चिकूची मोठ्या प्रमाणात लागवड आहे. चिकू बागायतदार आधुनिक शेती तंत्रज्ञानाचा वापर करत असल्याने फळाला जगभरात प्रसिद्धी मिळत आहे.

प्रक्रियायुक्त उद्योगांमध्ये चिकूची मोठ्या प्रमाणात आवक आहे. गेल्या दोन दिवसांमध्ये झालेल्या वादळी पावसामुळे आणि ढगाळ वातावरणामुळे फायटॉपथोरा पालमायरा या बुरशीची मोठ्या प्रमाणात वाढ झाली आहे.

परिणामी फुलोरा गळणे, फळे काळी पडणे अशी लक्षणे दिसून येत असल्याने जिल्ह्यातील शेतकऱ्यांचे मोठे नुकसान होत आहे, असे शेतकऱ्यांकडून सांगण्यात आले.