Nagar News : पावसामुळे पारनेर तालुक्यातील गोरेगाव परिसरातील बंधारा फुटला. पाणी शेतात घुसल्याने शेत पिकांचे नुकसान झाले आहे. प्रशासनाने तातडीने पंचनामे करून नुकसान भरपाई मिळावी, अशी मागणी या भागातील शेतकऱ्यांनी केली आहे.

यंदाच्या पावसाळ्यात नगर जिल्ह्यात पहिल्यांदाच अनेक भागात जोरदार पाऊस झाला. पारनेर तालुक्यातील सुपा, पळशी, वाडेगव्हाण, पारनेर, गोरेगाव, ढवळपुरी, भाळवणी आदी परिसरांमध्ये चार दिवसांपूर्वी पावसाने जोरदार बॅटिंग केली.

गोरेगाव परिसरातही जोरदार पाऊस झाला. या पावसाने परिसरातील ढवळदरा वस्तीवरील सर्वात वरचा बंधारा फुटून शेकडो एकर क्षेत्रावर नुकसान झाले आहे.

बंधाऱ्याखालील शेती व शेतामध्ये असलेले बाजरी, सोयाबीन, शेवंती व इतर पिके जमिनीस वाहून गेले आहेत.

बंधारा फुटल्याने बंधारा खालील शेती वाहून गेल्याने त्यात राजू नांगरे, रावसाहेब नांगरे, बाबासाहेब नांगरे, भाऊ नांगरे, दीपक नरसाळे, भास्कर नरसाळे यांसह इतर शेतकऱ्यांच्या पिकाचे तसेच शेती जमिनीचे नुकसान झाले आहे.