Nagpur News : पेंच व्याघ्र प्रकल्पाच्या (Pench Tiger Reserve) बफर क्षेत्रात लवकरच सायकल भ्रमंती सुरू होणार आहे. ५० किलोमीटरची या भ्रमंतीचा श्रीगणेशा कोलितमारा आणि सिल्लारी या दोन ठिकाणांवरून करण्याचा मानस आहे.

या मार्गाला अंतिम मान्यता देण्यात आली असून, त्याची पाहणी लवकरच केली जाणार आहे. महिन्याभरात पर्यटकांना सायकलने पेंच प्रकल्पाच्या बफर क्षेत्रात फिरण्याचा आनंद लुटता येणार आहे.

पेंच प्रकल्पाच्या पुढाकाराने साहसी पर्यटनाचा एक मनोरंजक प्रवास सादर करण्याच्या प्रयत्नाचा हा एक भाग आहे.

एक दिवसाचा हा प्रवास असून, सिल्लारी आणि कोलितमारा या दोन्ही ठिकाणी सायकल पर्यटन करण्यास इच्छुक असणाऱ्यांना सायकली पुरविण्यात येणार आहे. स्वतःच्या सायकलही आणण्याची सुविधा राहणार आहे.

...असे आहे नियोजन

पेंच प्रशासनाचा पहिल्या टप्प्यात २५ सायकली उपलब्ध करून देण्याचा प्रयत्न आहे. ‘टूर द पेंच बफर’ ही ५० किलोमीटरची निसर्गाच्या सानिध्यातील सायकल भ्रमंती राहणार आहे.

या मनोरंजक साहसी सायकलिंग पर्यटनात १८ वर्षांवरील व्यक्तींना सहभागी होता येणार आहे. पेंच बफरमधील या भ्रमंती दरम्यान, कृषी क्षेत्र, गाव आणि काही बफरच्या जंगलातून सायकलीने प्रवासाची संधी आहे.

पर्यटकांना स्थानिक संस्कृती

या दरम्यान, पर्यटकांना स्थानिक संस्कृती, स्थानिक भाषा, लोककला, खाद्य संस्कृती, स्थानिक खाद्याचा अस्वादासह संस्कृतीही जाणून घेता येणार आहे. तसेच या भागात पिकविण्यात येणाऱ्या पिकांबद्दलही सविस्तर माहितीही दिली जाणार आहे. पर्यटकांच्या मार्गदर्शनासाठी यामार्गात दिशादर्शक लावण्यात येणार आहे. त्यामुळे पर्यटकांना मार्गक्रमण करताना सुकर जाणार आहे.

दऱ्याखोऱ्यांतून, डोंगर वाटांचा अनुभव मिळणार

सायकल भ्रमंती दरम्यान, हिरव्या दऱ्याखोऱ्यांतून, डोंगराच्या सुंदर वाटांमधून जाण्याचा अनुभवही मिळणार आहे. या पर्यटनामुळे स्थानिकांना हॉटेल्स, लोकसंस्कृती सादर करणे, सायकल दुरुस्तीसह गाईडच्या माध्यमातून अनेक रोजगार मिळणार आहे.

याशिवाय बाहेरून येणारे पर्यटक स्थानिक दुकानांतून वस्तू खरेदी केल्यास त्यातूनही आर्थिक सक्षमता या भागात येणार आहे.