Nagar News : आमदार रोहित पवार यांच्या पाठपुराव्यास यश आले असून, मंगळवारपासून (ता. ५) कुकडीचे आवर्तन सोडण्यात आले. १५ डिसेंबरला सुटणारे आवर्तन दहा दिवस आधीच सुटल्याने शेतकऱ्यांत आनंद आहे. आमदार रोहित पवार यांनी यासाठी पाठपुरावा केला.

कर्जत-जामखेड तालुक्यांसाठी महत्त्वाच्या असणाऱ्या कुकडी धरणाचे आवर्तन मंगळवारी (ता. ५) सुटले. आमदार पवार यांनी वेळोवेळी पाठपुरावा केल्याने १५ डिसेंबरला सुटणारे आवर्तन १० दिवस अगोदरच सुटले. यंदा ऑक्टोबर आणि नोव्हेंबर महिन्यांत पाऊस झाला नसल्याने दुष्काळाचे सावट उभे ठाकले आहे. या आवर्तनाने शेतकऱ्यांना फायदा होणार आहे.

आमदार पवार २० ऑक्टोबरला झालेल्या कालवा सल्लागार समितीच्या बैठकीला उपस्थित होते. कालवा सल्लागार समितीचे अध्यक्ष तथा पुण्याचे पालकमंत्री अजित पवार यांच्या अध्यक्षतेखाली झालेल्या बैठकीत दुष्काळसदृश परिस्थिती असल्याने कुकडीच्या पाण्याचे योग्य नियोजन करून लवकरात लवकर आवर्तन सोडावे,

अशी मागणी त्यांनी केली होती, तसेच ऑक्टोबर आणि नोव्हेंबर महिन्यांत पाऊस न झाल्यास कुकडीचे १५ डिसेंबर रोजी सुटणारे आवर्तन १५ ते २० दिवस अगोदरच सोडावे, अशी विनंती केली होती. त्याप्रमाणे अजित पवार यांनी संबंधित अधिकाऱ्यांना आदेश दिले होते.