Akola News : तालुक्यात रब्बी हंगामात लागवड होत असलेल्या हरभरा पिकावर उगवणीपासूनच संकटे घोंघावत चालली आहेत. हरभऱ्यावर कटवर्मचा प्रादूर्भाव दिसून येत असल्याने शेतकरी उपाययोजना करण्यासाठी व्यग्र झाले आहेत.

या वर्षी तालुक्यात मोठ्या प्रमाणात सोयाबीन पेरणी झाली होती. सोयाबीनचा हंगाम यंदा तोट्याचा राहिला. त्यामुळे शेतकरी आता रब्बी हंगामावर अवलंबून आहेत. हरभऱ्याची पेरणी जोमाने सुरू आहे.

हरभऱ्याची उगवण होत असतानाच हरभऱ्याचे पाने, शेंडे विविध किडी कुरतडत आहेत. यावर उपाययोजना करण्यासाठी शेतकरी विविध प्रकारच्या किडनाशकांची फवारणी घेत आहेत.

शेतकऱ्यांनी तालुक्यात खारपाण पट्ट्यात पाथर्डी, राणेगाव, भोकर, सिरसोली, पंचगव्हाण, खाकटा, नेर, आडसूळ, सांगवी, पिवदंळ, बाभूळगाव याभागांत शेतांमध्ये ओल मोठ्या प्रमाणात असल्याने पेरणी होत आहे.

तर हिवरखेड, बेलखेड, माळेगाव, तळेगाव, तळेगाव खुर्द, गोर्धा, हिंगणी, आकोली, काळेगाव या भागांत सिंचनाची सोय असल्याने शेतकरी हरभऱ्याच्या लागवडीला लागलेले आहेत.

काही ठिकाणी शेतकरी कपाशीचे पीकही काढून पेरणीची तयारी करू लागले आहेत. पेरणी केलेला हरभरा उगवू लागला आहे. त्यातच उगवणीनंतर लगेच विविध प्रकारचे किडे पिकाचे नुकसान करीत आहेत.