Akola News : यावल तालुक्यात शुक्रवारी (ता. १२) सायंकाळी झालेल्या अवकाळी पावसामुळे यावल शहर व तालुक्यातील शेकडो हेक्टरवरील केळी, गहू, मका आदी पिकांचे मोठे नुकसान झाले आहे. कापणी योग्य केळी ही जमीनदोस्त झाली आहे.

तसेच शेतातील मोठमोठे वृक्ष कोलमडले आहेत. या अवकाळी पावसाचा यावल तालुक्याच्या पश्चिम भागाला सर्वांत जास्त फटका बसल्याचे शनिवारी प्राथमिक पाहणी यांची दिसून आले आहे. तर महसूल विभागाला चोपडा आमदार लता सोनवणे यांनी तातडीने पाहणी करून पंचनामाच्या सूचना केल्या आहेत.

तहसीलदारांच्या माध्यमातून तलाठी मंडळ अधिकाऱ्यांच्या वतीने प्रारंभिक पाहणी करून नुकसानीचा प्राथमिक पंचनामा केला जात आहे.

तालुक्यात शुक्रवारी सायंकाळी जोरदार वादळासह गारपीट झाली. या वादळी पावसामुळे यावल तालुक्यातील पश्चिम भागाला मोठा फटका बसला आहे. यावल शहरालगत तसेच साकळी, दहिगाव, मोहराळा, हरिपुरा, चुंचाळे, बोराळे, थोरगव्हाण, विरोदा, पिळोदा, पथराडे, नायगावसह अनेक भागांमध्ये शेतातील केळी पीक, गहू, मका सह आदी पीक जमीनदोस्त झालेले दिसून आले आहे. या अवकाळी पावसाचा सर्वाधिक फटका यावल तालुक्यातील पश्चिम भागाला बसला आहे.

उघड्यावरील कांदा ओलाचिंब

सावखेडासिम, कोरपावली, महलखेडी, विरावली परिसरात सलग दुसऱ्या दिवशी शनिवारी (ता. १३) रात्री पुन्हा अवकाळी पावसाने जोरदार झोडपले. यात उघड्यावर पडलेला कांदा, मका पाण्याने ओले चिंब झाले तर केळी आडवी पडली. मका पीक जमीनदोस्त झाले. केळीचे खोड उन्मळून पडले. अनेक झाडे पत्रे उडाली.

याबाबत तलाठी व महसूल विभागाने कृषी विभागाने त्वरित पंचनामे करावेत, अशी मागणी संतप्त शेतकऱ्यांकडून होत आहे. आधीच कर्जबाजारी शेतकरी झाला आहे आणि या अवकाळी पावसाने पुन्हा शेतकऱ्यांना नुकसानाच्या डोहात ढकलण्याचे काम केलेले आहे. त्यामुळे शेतकरी वैतागला आहे. या प्रकाराकडे शासनाने लक्ष घालावे, अशी मागणी होत आहे.